नेपाल बायुसेना निगमले आजदेखि पोखरा भैरहवा र सिमरा उडान सुरु गरेको छ। दशैँ तिहार पर्वमा यात्रुको सुविधालाई लक्षित गरी यी क्षेत्रमा उडान भरिएको निगमले जनाएको छ।
निगमले दिएको जानकारी अनुसार निगमको जहाजले बिहान ६:३० मा पोखरा र र १०:३० बजेबाट भैरहवा उडान भरेको छ। सिमराका लागि बिहान ८:३० बजे उडान रहेपनि आज उडान नभएको निगमले जनाएको छ। सिमराका लागि बिगत ५ बर्ष देखि निगमको जहाज उड्न सकेको छैन।
पोखराका लागि २ हजार ५ सय ५०, भैरहवा ३ हजार २५, र सिमराको २ हजार २२५ रुपैयाँ भाडा निर्धारण गरिएको निगमले जनाएको छ। पोखरा र भैरहवामा भने जहाज बिग्रिएका कारण केहि महिनाअघि उडान रोकिएको थियो।
निगमसँग आन्तरिक उडानका लागि चारवटा जहाज छन् । हाल तीनवटा जहाजले मात्रै उडान भर्दैआएका छन् । बिग्रिएको जहाज पनि मर्मत भइसकेकाले अबको पाँच दिनभित्रमा उडान भर्ने निगमका प्रवक्ता रामहरि शर्माले जानकारी दिए।
निगमको हाल एक बोइङ र दुई एयर बस गरी तीन वटा जहाजले अन्तर्राष्ट्रिय उडान भर्दै आएको छ भने दुई वाइड बडी जहाज खरिदका लागि गत सोमबार ४५ दिने बोलपत्र आह्वान गरिसकेको छ।
