लुम्बिनी जनरल इन्स्योरेन्सको लाभांश पारित भएको छ । कम्पनीको मंगलबार भएको १५औं वार्षिक साधारण सभाले लाभांश प्रस्ताव पारित गरेको हो ।
कम्पनीको साधारणसभाले २० प्रतिशत हकप्रद समेतले पाउने गरी चुक्ता पुँजीको ८.१२५ प्रतिशत बोनस शेयर वितरण गर्ने प्रस्ताव पारित गरेको हो । त्यस्तै कर प्रयोजनको लागि ४२ लाख ९० हजार रुपैयाँ बराबर नगद लाभांश प्रदान गर्ने प्रस्ताव समेत पारित भएको छ ।
यस सँगै अब कम्पनीले हाल कायम चुक्ता पुँजी १ अर्ब ५ करोड ६० लाखको ८.१२५ प्रतिशतले हुन आउने ८ करोड ५८ लाख बराबरको बोनस शेयर वितरण गर्ने छ । त्यस्तै सभाले सञ्चालक समितिको वार्षिक प्रतिवेदन, आर्थिक वर्ष २०७५।०७६ को वासलात, नाफा नोक्सान हिसाव तथा नगद प्रवाह विवरण लगायतका प्रस्तावहरु पारित गरेको छ ।
साथै सभाले सर्वसाधारण शेयरधनीहरुको समूहबाट गणेश राज रेग्मी र कमल भटृराई आगामी चार बर्षको लागि निर्बिरोध निर्वाचित गरेको छ । आर्थिक वर्ष २०७५।०७६ मा अघिल्लो वर्षको तुलनामा बीमाशुल्क ८ प्रतिशतले बृद्धि भई १ अर्ब ३६ करोड बीमा शुल्क आर्जन भएको जानकारी गराइएको जनाइएको छ ।