प्रधानमन्त्री केपी शर्मा ओलीले त्रिशुली जलविद्युत कम्पनीले निष्काशन गरेको आईपिओमा आवेदन दिएका छन्। ओलीले बिहिबार बिहान आफ्नै निवास बालुवाटारबाट मेरो शेयर अनलाइन मार्फत शेयरमा आवेदन दिएका हुन् । त्रिशुली जलविद्युत कम्पनीले जनताको जलविद्युत योजना अन्तर्गत आईपिओ निष्काशन गरेको हो । पहिलो शेयर आफुले हाल्ने प्रतिबद्दता अनुसार ओलीले शेयरमा आवेदन दिएका हुन् ।
त्यस्तै उर्जा मन्त्री बर्षमान पुनले पनि यहि आईपिओमा आवेदन दिएका छन् । कम्पनीका प्रबन्ध निर्देशक मोहन गौतमका अनुसार प्रधानमन्त्री र उनकी पत्नीले समान १० हजार कित्ताको लागि आवेदन दिएका हुन्। त्यस्तै उर्जामन्त्रीले एक हजार कित्ताको लागि र उनकी पत्नीले २ हजार कित्ताको लागि आवेदन दिएका छन् । आईपिओमा आवेदन दिने प्रधानमन्त्रीले मंगलबार मात्र डिम्याट खाता खोलेका थिए ।
कम्पनीले जारी पूँजी दुई अर्ब ४७ करोड को १५ प्रतिशत अर्थात ३७ करोड पाँच लाख बराबरको १०० अङ्कित दरको ३७ लाख पाँच हजार कित्ता साधारण सेयर निष्काशन गर्न लागेको हो । जस मध्ये ३ प्रतिशत कम्पनीका कर्मचारीका लागि छुट्याई बाँकी ३५ लाख ९३ हजार कित्ता सेयरमा सर्वसाधारणकाले आवेदन दिन सक्ने छन् । यहि सर्वसाधारणलाई छुट्याइएको शेयरमा प्रधानमन्त्रीले पनि आवेदन दिएका हुन । आवेदन दिंदा न्युनतम एक सय कित्ता र अधिकतम १० हजार कित्ताको लागि आवेदन दिन सक्ने ब्यबस्था छ ।
जनताको जलविद्युत आयोजनामा रहेको ब्यबस्था अनुसार कम्पनीले हालको लागि प्रति शेयर १० रुपियाँको दरले अग्रिम रकम मात्र माग गरेको हो । यस हिसाबमा हालको लागि लगानीकर्ताले एक हजार मै सय कित्ताको लागि आवेदन दिन सक्ने छन् । बाँकि ९० रुपियाँ रकम कम्पनीले पछि माग गर्ने छ । अर्थात आयोजनाको भौतिक प्रगति ५० प्रतिशत पुरा भएपछि बाँकि ९० प्रतिशत रकम दिनु पर्ने छ ।
कम्पनीले ३७ मेगावाटको माथिल्लो त्रिशुली थ्री ‘बी’ जलविद्युत् आयोजना निर्माण गरिरहेको छ । विसं २०७२ जेठ २४ मा विद्युत् उत्पादन अनुमतिपत्र प्राप्त गरेको उक्त आयोजनाले विसं २०७४ भदौ ६ मा विद्युत् खरीदबिक्री सम्झौता (पिपिए) र २०७५ भदौ ४ मा ऋण सम्झौता (सिएफए) गरेको थियो । आयोजनाले हालसम्म साइट आवास, कार्यालय भवन, जग्गा अधिग्रहण, टेस्ट अडिट टनेल, पहुँच मार्गसम्मको अधिन, वन क्षेत्रको प्रयोग र रुख कटानलगायतका कार्य सम्पन्न गरिसकेको छ । उत्पादित विद्युत् केन्द्रीय प्रसारण लाइनसम्म पु¥याउन उत्पादनगृहदेखि थ्री ‘बी’ हबसम्म जडानका लागि लैजान आवश्यक पर्ने तीन किमी दूरीको १३२ केभी प्रसारण लाइन निर्माणकार्य हाल जारी रहेको छ ।
समग्रमा आयोजनाको भौतिक प्रगति २९ प्रतिशत र वित्तीय प्रगति १२ प्रतिशत छ । आयोजना निर्माणको जिम्मेवारी चिनियाँ कम्पनी सिचुवान एन्हे हाइड्रोलिक तथा हाइड्रोइलेक्ट्रिक इञ्जिनीयरिङ कम्पनीमार्फत भइरहेको छ ।
यो पनि :
लागत होइन युनिट हेरौ, सुरुमा १५ प्रतिशतसम्म लाभांश दिन सक्छौ: एमडी, त्रिशुलीहाइड्रो (अन्तवार्ता)
