शांग्रिला विकास बैंकको लिलामीको शेयर बोलपत्र खोल्ने काम सकिएको छ । बिक्रि प्रबन्धक प्रभु क्यापिटलको कार्यालयमा शुक्रबार बोलपत्र खोलिएको हो । बैंकले चैत्र १३ गतेदेखि २० गतेसम्म ९ लाख १ हजार ९ सय ९७ दशमलव ५० कित्ता शेयर लिलाममा राखेको थियो । जस मध्ये संस्थापकतर्फ ३ लाख ५२ हजार ७ सय २२ दशमलव ५० कित्ता र बाँकि ५ लाख ९ हजार २ सय २५ कित्ता शेयर साधारणतर्फको शेयर रहेका थिए ।
बिक्रि प्रबन्धक प्रभु क्यापिटलले दिएको जानकारी अनुसार संस्थापक तर्फ कुल ७१ आवेदन परेका थिए भने सर्बसाधारण तर्फ कुल १२ सय २५ आवेदन परेका थिए । संस्थापकतर्फको कट अफ मूल्य १०५ कायम भएको छ भने सर्वसाधारणतर्फको कटअफ मूल्य १ सय ४२ कायम भएको छ । २१ जनाले १ सय ४२ मूल्य कबुल गरेर आवेदन दिएका थिए । केवल ३२० जनाले सर्वसाधारणतर्फको शेयर पाउने भएका छन् ।
संस्थापक तर्फ १५६ रुपियाँसम्मको लागि आवेदन परेको थियो भने सर्बसाधारणतर्फ २ सयसम्मको आवेदन परेको प्रभु क्यापिटलले जनाएको छ ।
सर्बसाधारणतर्फ सिद्दार्थ इक्विटी फण्डले १४२ रुपियाँमा ५० हजार कित्ता, सिद्दार्थ ईक्विटी ओरियन्टेड स्किमले १३२ मा ५० हजार कित्ता, बिरेन्द्र शाहले १ सय २७ मा १ लाख कित्ता, कृति क्यापिटलले १४९.५१ मा २०० कित्ता माग गरेका थिए ।
हाल बैंकको चुक्ता पूँजी एक अर्ब ३५ करोड रुपैया छ । हकप्रद निष्काशन तथा सेयर लिलामी पश्चात बैंकको चुक्ता पूँजी दुई अर्ब ४४ करोड ५२ लाख रुपैयाँ पुग्नेछ ।
