आज बस्ने भनिएको मन्त्रिपरिषद्को बैठक स्थगित भएको छ । सातवटै प्रदेशमा प्रदेश प्रमुख नियुक्त गर्ने र प्रदेशको अस्थाई मुकाम तोक्न आज दिउँसो ४ बजेको लागि मन्त्रिपरिषद्को बैठक डाकिएको थियो ।
प्रधानमन्त्री शेर बहादुर देउवाले दलीय सहमति मै यी दुई बिषय टुंग्याउन चाहेका थिए । त्यसका लागि देउवाले एमाले र माओवादीका नेताहरुसँग अनौपचारिक छलफल गर्ने तयारी गरेका थिए । तर आज छलफल हुन् नसकेपछि मन्त्रिपरिषद बैठक नै स्थगित भएको हो ।
यद्यपि देउवाले आफ्नै पार्टीका शिर्ष नेताहरु संग भने आन्तरिक छलफल गरेका छन् ।
देउवाले प्रदेश प्रमुख नियुक्ति दलीय भागबण्डामा गर्न ५ राष्ट्रिय दलसंग नाम माग गरेका थिए । स्रोतका अनुसार कांग्रेसले अनुराधा कोइरालाको नाम टुंग्याएको छ । त्यस्तै राजपाले उमाकान्त झा र संघीय समाजवादी फोरमले रत्नेश्वर लाल कायस्थको नाम देउवालाई दिएका थिए । तर एमाले माओबादीले प्रदेश प्रमुख नियुक्तिको काम सरकारको भएको भन्दै कुनै नाम नै दिएको छैन। सो संगै दलीय भागबण्डामा प्रदेश प्रमुख नियुक्त हुने सम्भावना टरेको छ ।
अब मन्त्रिपरिषद्को बैठक बैठक भोलि बिहान बस्ने प्रधानमन्त्रीका स्वकिय सचिव भानु देउवाले जानकारी दिए । भोलीको बैठकले राजनीतिक संलग्नता नभएका, पूर्वन्यायाधीश, पूर्वप्रशासक, सामाजिक प्रतिष्ठा भएका व्यक्तिहरूलाई प्रदेश प्रमुख नियुक्त गर्ने सम्भावना छ। नियुक्ति विवाद रहित बनाउन समेत सरकारले गृहकार्य थालेको छ ।