पूर्वप्रधानन्यायाधीश गोपाल पराजुलीविरुद्ध प्रचलित कानून विपरीत नागरिकताको विवरण सच्याएको र शैक्षिक प्रमाणपत्र लिएको भन्दै उजुरी परेको छ । महानगरिय प्रहरी परिसर टेकुमा आज सोमबार पत्रकार मदन भण्डारीले जाहेरी दर्ता गरेका हुन् ।
उजुरीमा पराजुलीले नागरिकता र शैक्षिक योग्यताका प्रमाणपत्रसम्बन्धी अपराध गरेको, नागरिकताको प्रतिलिपि बनाउँदा उमेर सच्याएको, शैक्षिक योग्यताका प्रमाणपत्रमै फरक उमेर भेटिएको र शैक्षिक योग्यताको प्रमाणपत्र बुझाउनु पर्ने ठाउँमा नबुझाएको उल्लेख गरिएको छ।
जाहेरीमा सेवा प्रवेश गर्दा अर्को मिति , शैक्षिक प्रमाणपत्रहरूमा अलगअलग मिति भएका पराजुलीले प्रधानन्यायाधीशको पद लम्ब्याउनको लागि शैक्षिक प्रमाणपत्रका कागजात न्यायपरिषद् सचिवालयमा समेत पेश नगरेको दाबी गरिएको छ। जाहेरीमा शैक्षिक प्रमाण र नागरिकताको बारेमा सत्यतथ्य छानविन गरी निजलाई हदैसम्मको कारबाही गर्न माग गरिएको छ ।
जाहेरिमा भनिएको छ, ‘निज गोपाल पराजुलीको कार्य नागरिकता ऐन, २०६३ को कानूनी व्यवस्थाविपरित भएकाले अनुसन्धान गरी निजलाई हदैसम्मको कारबाही गरि पाऊँ। त्यस्तै नेपाल ल क्याम्पस, परिक्षा नियन्त्रण कार्यालय, जिल्ला प्रशासन कार्यालय जस्ता निकायबाट उनका नागरिकता र शैक्षिक योग्यताका प्रमाणपत्रबारे सोधपुछ गरी आवश्यक कारवाही गर्न पनि जाहेरीमा माग गरिएको छ।