पहिलो संस्करणको एभिसी एसियन सेन्ट्रल जोन सिनियर महिला भलिबल च्याम्पियनसिप उपाधि नेपालले जितेको छ । नेपाली महिला भलिबल टोली एभिसी च्याम्पियन बन्दै नेपाली भलिबल खेलको इतिहासमै पहिलोपटक स्वर्णपदक जितेको हो ।
बिहिबार भएको फाइनल खेलमा नेपालले माल्दिभ्सलाई ३–० को सोझो सेटमा पराजित गर्दै ऐतिहासिक उपधि उचालेको हो । खेल अवधिभर नेपाल अपराजित र एक सेट पनि नगुमाई च्याम्पियन बन्न सफल भएको हो । आजको खेलमा नेपालले पहिलो सेट २५–१३, दोस्रो सेटमा २५–१२ र तेस्रो सेटमा २५–८ को एकपक्षीय जित निकाल्दै च्याम्पियन बन्न सफल भएको हो ।
किर्गिस्तानले घरेलु टोली बंगलादेशलाई ३–० को सोझो सेटमा पराजित गर्दै तेस्रो भएको छ ।
सन् २०१४ मा काठमाडौंमा आयोजना भएको दक्षिण एसियाली आमन्त्रण महिला भलिबल च्याम्पियनसिपमा जितेको रजतपदक नै नेपाली भलिबलको सबैभन्दा ठुलो पदक थियो । यो बाहेक नेपालले दक्षिण एसियाली खेलकुद प्रथियोगिता (साग) मा तीन कास्यपदक जितेको थियो ।
पुरुष भलिबल टोलीले पनि हालसम्म जितेको सबैभन्दा ठूलो पदक कास्य मात्रै हो ।
