आगामी आर्थिक वर्षको बजेटले दिने भनेको भन्सार छुटका बारेमा नीजि क्षेत्रका २ संगठनबीच आरोपप्रत्यारोप चुलिएको छ ।
बजेटमा बिस्कुट उद्योगलाई ५ प्रतिशत भन्सार महशुल तिरेर पाम आयल, पामोलिन जस्ता कच्चा पदार्थ आयात गर्न दिने व्यवस्था गरिएपछि नेपाल वनस्पति घिउ तेल उत्पादक संघ र नेपाल बिस्कुट उत्पादक संघबीच आरोप प्रत्यारोप सुरु भएको हो ।
भन्सार महशुल घटाएर पाम आयल, पामोलिन आयात गर्न दिने व्यवस्थाप्रति वनस्पति घिउ तेल उत्पादक संघले बुधबार विरोध जनाएको थियो । शुक्रबार नेपाल बिस्कुट उत्पादक संघले वनस्पति घिउ तेल उत्पादक संघलाई काउन्टर दिँदै अर्को विज्ञप्ति जारी गरेको हो ।
घिउ तेल उत्पादक संघले उपभोक्तालाई प्रत्यक्ष राहत दिन खाने तेलको महशुल दर कम गर्नुको सट्टा बिस्कुट र चाउचाउ उद्योगहरुलाई कम महशुलमा प्रशोधित पाम र पामोलिन तेल आयात गर्न दिनु गलत भएको बताएको थियो ।
संघले कच्चा पदार्थ भन्दा बढी मूल्यमा तयारी बस्तु आयात गर्न दिनु सबै हिसाबले गलत भएको दाबी गरेको थियो ।
तर, आज नेपाल बिस्कुट उत्पादक संघले आफ्नो उद्योगलाई चाहिने कच्चा पदार्थ आयातमा सुविधा दिँदा किन टाउको दुखेको ? भन्दै प्रश्न गरेको छ ।
