नेपाल बीमा प्राधिकरणले आईआरएमआईएस सम्बन्धी मार्गदर्शन, २०८० जारी गरेको छ । प्राधिकरण तथा बीमकको तथ्याङ्क व्यवस्थापन एवं कामलाई प्रभावकारी तथा पारदर्शी बनाउन उक्त मार्गदर्शन बनाएको प्राधिकरणले जनाएको छ ।
ईन्स्योरेन्स रेगुलेटरी म्यानेजमेन्ट ईन्फर्मेशन सिस्टम (आईआरएमआईएस) एक सूचना व्यवस्थापन गर्ने सिस्टम भएको प्राधिकरणका तथ्यांकशास्त्रि बसन्त बोहोराले जानकारी दिए । यो सबै ढड्डा तथा फाइलहरुलाई हटाएर पेपरलेसमा लैजाने प्रणाली भएको उनले जनाए । उनका अनुसार प्राधिकरणमा बीमा कम्पनीहरुले प्राधिकरणमा पठाउनुपर्ने विवरणहरु यसै प्रणाली मार्फत पठाउन सक्नेछन् । जसकालागि कम्पनीहरुलाई पनि लग ईनको सुविधा दिइएको हुन्छ ।
यसैगरी प्राधिकरणको विभागले पनि यसै सिस्टममा फाइलहरु राख्न सक्ने जनाइएको छ । सबै विभागकालागि छुट्टा छुट्टै लगईन दिइएको हुन्छ । यस प्रणाली पहिलादेखि नै लागु भइसकेको तर अहिले मार्गदर्शन नै बनाएर पूर्णरुपमा लागु गर्न लागिएको जनाइएको छ ।
मार्गदर्शन गत मसिंरमा १३ गते नै प्राधिकरणले स्विकृत गरेर आज मंगलबार जारी गरेको हो ।