काठमाडौँमा जग्गा प्लटिङ बढिरहेको छ । काठमाडौँ, भक्तपुर र ललितपुरका विभिन्न ठाउँमा प्लटिङ र आवास विकास परियोजना बनिरहेका छन् । तर कहाँ कहाँ प्लटिङ भईरहेको छ भन्ने यकिन तथ्यांक भने छैन ।
काठमाडौँ उपत्यका विकास प्राधिकरणका अनुसार ३८२ परियोजना छन् । योजनावद्ध आवासीय घडेरी, सामूहिक आवास, संयुक्त आवास, व्यापारिक व्यवसायिक भवन, स्वास्थ्य संस्था, होटल/पर्यटन भवन, कार्यालय भवन र अन्य गरी उपत्यकामा जम्मा ३८२ परियोजनाले अनुमति पाएका छन् ।
तर, काठमाडौँ उपत्यकाको ठाउँ ठाउँमा बिना योजना प्लटिङ भईरहेको आवास विकासकर्ताहरु नै स्वीकार गर्छन् । २०७८ असार पछि भने प्राधिकरणले अनुमति दिएका योजनाको अद्यावधिक गरेको छैन ।
कुन जिल्लामा कुन परियोजना कति ?
काठमाडौँमा २२९, ललितपुरमा १०५ र भक्तपुरमा ४६ परियोजनालाई अनुमति दिईएको प्राधिकरणले जनाएको छ ।
सूचीः
‘यो तथ्यांक वास्तविक होइन’
५ रोपनीभन्दा बढी जग्गा प्लटिङको लागि प्राधिकरणको अनुमति चाहिन्छ । ५ रोपनीभन्दा बढी जमिन प्लटिङको अनुमति काठमाडौँ उपत्यकाका ३ वटै जिल्लामा रहेको प्राधिकरणको जिल्ला आयुक्तको कार्यालयले दिन्छन् ।
५० रोपनी बढी जग्गा प्लटिङ गरेर कुनै परियोजना विकास गर्नु परेको खण्डमा भने भौतिक विकास समितिले नै अनुमति दिनुपर्ने व्यवस्था छ ।
तर प्राधिकरणकै अधिकारी र घरजग्गा व्यवसायीहरु उपत्यकामा जम्मा ३८२ मात्रै आयोजना रहेकोमा विश्वास गर्दैनन् ।
एकजना घरजग्गा व्यवसायी भन्छन्, ‘यो त अनुमति लिएकाको लिष्ट भयो, हामीहरु यो भित्र पर्छौँ, तर बिना अनुमति वडासँग, नगरपालिकासँग मिलेर भईरहेका प्लटिङको रेकर्ड छैन । बैंकहरुको लगानी त्यस्ता परियोजनामा बढी छ । अनि राष्ट्र बैंक हुलमुलमा सबैलाई एउटै डालोमा हालेर घरजग्गा क्षेत्र अनुत्पादक क्षेत्र भनिदिन्छ ।’
