असोज महिनामा घरजग्गा कारोबारबाट चार अर्ब रुपैयाँ बढी राजस्व संकलन भएको छ । भुमि व्यवस्थापन तथा अभिलेख विभागका अनुसार असोज महिनामा घरजग्गा कारोबारबाट चार अर्ब ४३ करोड ५४ लाख ८८ हजार ५६७ रुपैयाँ राजस्व संकलन भएको हो ।
असोजमा भदौ महिनाको तुलनामा एक अर्ब ३८ करोड ९५ लाख रुपैयाँ बढी राजस्व संकलन भएको छ । भदौमा यस्तो राजस्व तीन अर्ब चार करोड ५९ लाख ४६ हजार रुपैयाँ राजस्व संकलन भएको थियो ।
भदौ महिनाको तुलनामा असोजमा कारोबार बढेसंगै राजस्वमा पनि वृद्धि भएको हो । भदौमा ३५ हजार ६४६ पटक घरजग्गाको कारोबार भएकामा असोजमा भने ३९ हजार ७९३ पटक घरजग्गा कारोबार भएको विभागको तथ्यांकले देखउँछ ।
यसैगरी, असोज महिनामा कित्ताकाट पनि बढेको छ । यो महिनामा ४७ हजार ३९८ वटा कित्ताकाट भएर एक लाख छ हजार ३४९ वटा कित्ता कायम भएको छ । भदौमा भने २६ हजार २८० वटा कित्ताकाट भएर ८० हजार ३१७ वटा कित्ता कायम भएको थियो ।
