वैशाख ३० गतेका लागि घोषणा गरिएको स्थानीय
निर्वाचन आउन अब मुश्किलले २५ दिन बाँकी रहेको छ । सत्ता गठबन्धनमा रहेका कांग्रेस,
माओवादी, नेकपा एसलगायत ५ दल र प्रमुख प्रतिपक्षी दल नेकपा एमाले चुनावका लागि
आ-आफ्ना रणनीतिक लेखाजोखा गरिरहेका छन् ।
स्थानीय तहको निर्वाचनमा महानगरको प्रतिस्पर्धा
पेचिलो हुने देखिएको छ । ६ महानगरमध्ये नेकपा एमालेले चितवनको भरतपुर महानगरपालिकाको
मेयरमा बिजय सुवेदीलाई उम्मेदवार बनाउने निर्णय गरिसकेको छ ।
गत २०७४ को स्थानीय निर्वाचनमा भरतपुर महानगरपालिकाको
मेयरमा नेकपा माओवादी केन्द्रको तर्फबाट रेणु दाहाल विजयी भएकी थिइन् । त्यतिबेला
कांग्रेस र माओवादी केन्द्रबीच तालमेल भएको थियो । यतिबेला पनि सत्तारूढ दल
तालमेलमै छ । भरतपुरकै बारेमा बिजपाटीले सुवेदीसँग प्रश्न गरेको थियो,
'सत्तारूढ गठबन्धनसँग लडेर मेयरमा जित्ने तपाईंको दाबीका पछाडि केके आधारहरू छन् ?'
प्रस्तुत छ, सुवेदीसँग गरिएको कुराकानीको
सम्पादित अंश -
भरतपुरमा कांग्रेस माओवादीलगायत दलहरूबीच
गठबन्धन हुने चर्चा चलिरहेको छ । यस्तो अवस्थामा एमालेको उम्मेदवार तपाईंले
असुरक्षित महसुस गर्नुभएको छैन ?
अन्य दलबाट को उम्मेदवार आउनुहुन्छ, के
गर्नुहुन्छ भन्ने कुरामा त्यति वास्ता गर्दिन । उहाँहरूले गठबन्धन गर्नुहुन्छ कि
छुट्टाछुट्टै गर्नुहुन्छ, त्यसको कुनै अर्थ छैन । मसँग एजेण्डा छ, म एजेण्डाको
राजनीति गर्ने मान्छे हो । भरतपुर महानगरलाई अन्तर्राष्ट्रिय मापदण्डको शहर
बनाउने, त्यसका लागि हामीले गर्नुपर्ने कामहरू यी यी हुन् र त्यही काम गर्नका लागि
म आएको छु भनेर मतदातासँग जाने हो ।
के छन् तपाईंसँग त्यस्ता एजेण्डा ? एक, दुई, तीन,
चार भन्दिनुस् न !
कुनै पनि गन्तव्यमा पुग्न पहिला लक्ष्य
निर्धारण गर्नुपर्छ । संसारभरका जति पनि विकासका लक्ष्यहरू छन्, त्यसलाई पूरा गर्न
सबैभन्दा पहिला गुरूयोजना बनाउनुपर्छ । व्यवस्थित प्लान गरिन्छ र काम अघि बढाउने
हो । व्यवस्थित योजना नभएसम्म काम अघि बढ्न सक्दैन । काठमाडौँलगायत अन्य ठाउँमा
जति पनि शहरीकरण भइरहेको छ, त्यो बिनायोजना भइरहेको छ ।
शहरीकरणका लागि पहिल्यै नै प्लान हुनुपर्थ्यो ।
यो नभएका कारण काठमाडौँको हविगत अहिले राम्रो छैन । नदीनाला सफा छैनन्, दुर्गन्धित
छन् । यस्तो अवस्था हाम्रो भरतपुरमा नआओस भन्नेमा म सजग छु । नागरिकको आवागमन सहज
होस्, कुनै पनि प्रकारका ट्राफिक जाम कहिल्यै कतै नहोस् ।
प्रत्येक नागरिकको पालनपोषण, शिक्षादीक्षा,
स्वास्थ्य रोजगारी, खेलकूद, बाटो, सञ्चारलगायत सबै विषयलाई केन्द्रमा राखेर मैले
राजनीति गरेको छु । यसका साथमा पार्क, खेलमैदान र सबै संरचना भएको महानगरको गुरुयोजना
बनाएर अघि बढ्नु मेरो प्राथमिकतामा रहन्छ ।
जसरी घर बनाउन पहिला राम्रो नक्सा बनाउनुपर्छ,
त्यसै गरेर सभ्य र विकसित सहर बनाउन राम्रो गुरुयोजना चाहिन्छ । हामीले भरतपुरलाई
प्राकृतिक ऐश्वर्य भएको, स्वच्छ, हरियाली र समृद्ध मानवीय सहर बनाउन सकिन्छ ।
हामीसँग स्रोत साधन त प्रशस्त छ, तर त्यतिले मात्र पुग्दैन । मानवीय संसाधनको पनि
उत्तिकै आवश्यकता पर्छ ।
महानगरको फोहोरमैला व्यवस्थापन चुनौतीपूर्ण
हुँदैन र ? मेयर भएपछि त्यसको व्यवस्थापन कसरी गर्नुहुन्छ ?
म भरतपुरमा एउटा पनि प्लास्टिक नभेटियोस् भन्ने
देखाउन चाहन्छु । फोहोरमैलाको व्यवस्थापन चुनौतीपूर्ण छ तर गुरुयोजनासहित सबै
पक्षलाई साथमा लिएर अघि बढे त्यो काम सहजै सम्पन्न हुने मेरो बुझाइ छ । जताततै
फलफूलका रुख बिरुवा रोप्न सकिन्छ । प्राकृतिक, सुन्दर र हरियाली सहर बनाउन म
लागिपर्नेछु ।
तपाई प्रदेश सभा सदस्यमा निर्वाचित नेता पनि
हुनहुन्छ । अनि संघीय संसदको सदस्यको दाबेदारी नगरेर मेयरमा उठ्ने इच्छा किन
गर्नुभयो ?
म अहिले पनि वागमती प्रदेशसभा सदस्य हो । जनप्रतिनिधिका
रूपमा जुनसुकै पद पनि मेरो लागि गौरवको पद हो । मेयर होस्, प्रदेश सभा सदस्य होस्
या संघीय संसद सदस्य होस्, सबैको मुख्य लक्ष्य भनेको जनताकै अधिकतम सेवा हो ।
अहिले मेयरको आकांक्षी छु र यसमा म गौरव गर्छु ।
अहिलेका मेयरले पनि तपाईंले सुनाएकै एजेण्डामा
काम भइरहेको दाबी गर्छन्, अन्य दलका उम्मेदवारले पनि भन्ने यही होला, हैन र ?
होइन, यी मेरा एजेण्डा हुन् र यिनीहरूलाई लागू
गर्न म नै मेयर हुनुपर्छ । अरूका एजेण्डा के हुन्, कसो गर्छन् त्यो जनताले हेर्ने
कुरा हो । पार्टीले पनि यो मान्छेबाट यी कुराहरू हुन सक्छन् भनेर नै मलाई
उम्मेदवार बनाउने निर्णय गरेको हो । यी कुराहरू गर्न प्रदेश सभा सदस्यबाट असम्भव छ
।
चुनाव आइसक्यो, घोषणापत्र तयार पार्नुभयो ?
त्यो तयार हुँदैछ । त्यसैका लागि काठमाडौँ आएको
थिएँ । अब फर्किदैछु ।
गठबन्धनका अगाडि तपाईंलाई चुनाव जित्न गाह्रो
लाग्दैन ? के छ चुनाव जित्ने तपाईंको रणनीति ?
चुनाव जित्न कुनै गाह्रो काम होइन ।
प्रतिनिधिले आफ्नो एजेण्डा राख्ने हो, जसको एजेण्डा मन पर्छ, उसैलाई मतदाताले भोट
हाल्छन् । अहिले मेरो एजेण्डा जनताले मन पराइरहनु भएको छ । म जहाँ जान्छु त्यहाँ
जनता उत्साहित भएको मैले पाएको छु । जनताले हालेको मत सुरक्षितसाथ गन्ने व्यवस्था
गरेर घोषणा हुनुपर्यो । यसअघिको चुनावमा मत सुरक्षित देखिएको थिएन ।
भरतपुरका नागरिक सचेत हुनुहुन्छ । उहाँहरूले
छलछाम गर्नेहरूलाई चिन्नुभएकै छ । भरतपुरलाई एउटा राम्रो सहर बनाउने सबैको उत्कट
आकांक्षा छ । मेरो एजेण्डा त्यही भएकाले मलाई चुनाव जित्न कुनै गाह्रो चीज हो
जस्तो लाग्दैन ।
भरतपुरको जनसंख्या कति हो र मतदाता कति छन् ? तपाईले
कति मत ल्याउने आंकलन गर्नुभएको छ ?
भरतपुरमा ३ लाख ६९ हजार ३ सय ७७ जनसंख्या छ भने
तीमध्ये १ लाख ८५ हजार ७ सय ५२ मतदाता छन् । मैले जित्ने कुरा त ढुक्क नै छ, यति
उति मत ल्याउँछु भनेर अहिले किन भन्नुपर्यो र ?
देवी ज्ञवालीलगायत अन्य आकांक्षीहरू हुँदाहुँदै
तपाईको पार्टीले तपाईंलाई विश्वास गर्नुका आधारहरू केके हुन् ?
देवी ज्ञवालीज्यूले यसपटक हजुर उठ्नुस भनेर
उहाँले नै मलाई प्रस्ताव गर्नुभएको हो । उहाँले आफ्नो हिसाबले अध्ययन गर्नुभएको
होला । म नभएपनि हुन्छ भनेर उहाँले मलाई प्रस्ताव गर्नुभएको हो । अघिल्लोपटक पनि म
मेयरमा उठ्न इच्छुक थिएँ । त्यतिबेला म भन्दा पनि सिनियर देवी ज्ञवालीज्यू भएकाले
त्यतिबेला मैले उहाँलाई छोडें, अहिले उहाँले मलाई छोड्नुभयो ।
तपाईंहरू पनि राप्रपालगायत अन्य दलहरूसँग
तालमेल गर्दै हुनुहुन्छ भन्ने सुनिन्छ नि !
अहिले अन्य दलहरूसँग तालमेलको कुनै कुरा चलेको छैन ।