आँखुखोला जलविद्युत कम्पनी Ankhu Khola Jalvidhyut Company ले शेयर डिम्याट नगराएका लगानीकर्तालाई शेयर डिम्याट गराउन आग्रह गरेको छ । कम्पनीले हालसम्म पनि शेयर डिम्याट नगराएका स्थानीय र संस्थापक शेयरधनीहरुलाई शेयर डिम्याट गराउन भनेको हो ।
कम्पनीले शेयर डिम्याट नगराएका संस्थापक शेयरधनीलाई आफ्नो शेयर सर्टिफिकेट लिएर सिभिल क्यापिटलबाट नयाँ सर्किफिकेट लिई आफ्नो निक्षेप सदस्यसँग सम्पर्क गरि डिआरएन बनाएर सहज रुपमा शेयर डिम्याट गराउन भनेको छ । त्यस्तै शेयर डिम्याट नगराएका आयोजना प्रभावित स्थानीयलाई आफ्नो सर्टिफिकेट लिई आफ्नो निक्षेप सदस्यसँग सम्पर्क गरि डिआरएन बनाएर सहज रुपमा शेयर डिम्याट गराउन कम्पनीले आग्रह गरेको छ।
कम्पनीको संस्थापक शेयर र आयोजना प्रभावित स्थानीयको शेयरको समेत लकिङ पिरियड सकिएर नेपाल स्टक एक्सचेन्ज नेप्सेमा कारोबार योग्य भईसकेको छ। आयोजना प्रभावित धादिङका स्थानीय र संस्थापकलाई शेयर बाँडफांड गरेको ३ वर्ष पुगेकोले लकिङ पिरियड सकिएको हो ।
कम्पनीको ६० लाख कित्ता संस्थापक शेयर बाँडफाँडको भएको गत कार्तिक ११ गते ३ वर्ष पुगेकोले कार्तिक १२ गतेदेखि लकिङ पिरियड समाप्त भएको छ। गत कार्तिक १४ गतेबाट यी शेयर नेप्सेमा कारोबार सुरु भएको हो।
आयोजना प्रभावित स्थानीयलाई बाँडफाँड गरिएको शेयर गत असोज ५ गतेबाट नै कारोबार योग्य भईसकेका छन् । स्थानीयलाई २०७५ असोज ४ गते ६ लाख २३ हजार ९ सय ८० कित्ता शेयर बाँडफांड गरिएकोमा असोज ४ गते ३ वर्ष पुरा भई असोज ५ गतेबाट ति शेयरको कारोबार खुला भएको हो ।
