नेपाल स्टक एक्सचेन्ज नेप्सेमा गुराँस लाइफ इन्स्योरेन्सको शेयर मूल्य समायोजन भएको छ । कम्पनीको ७.४४२५ प्रतिशत बोनसमा मूल्य समायोजन भएको हो ।
समायोजनपछि कम्पनीको शेयर मूल्य प्रति कित्ता ४५१.५० रुपैयाँ कायम भएको छ । समायोजन अघि कम्पनीको शेयर मूल्य प्रति कित्ता ४८५ रुपैयाँ थियो ।
कम्पनीले साधारणसभा प्रयोजनको लागि आज असोज २६ गते बुक क्लोज गर्ने निर्णय गरेकोले आजा मूल्य समायोजन भएको हो । असोज २५ गतेसम्म कायाम शेयरधनीले मात्र सभामा भाग लिन तथा प्रस्तावित लाभांश पाउँन सक्ने छन् । कम्पनीले युनियन लाइफ र प्राइम लाइफ सँग मर्जरको लागि सम्झौता गरेसँगै कम्पनीको कारोबार रोक्का छ ।
कम्पनीको सभामा कम्पनीको वार्षिक प्रतिवेदन, नाफा नोक्सान हिसाब, नगद प्रवाह विवरण, पारित गर्ने प्रस्ताव पेश हुने छ । त्यस्तै लेखापरीक्षक नियुक्त गर्ने र निजको पारिश्रमिक तोक्ने प्रस्ताव पनि पेश हुने छ ।
साथै मर्जरको लागि हालसम्म भएका गरेका कार्य अनुमोदन गर्ने, मर्जरको लागि बाँकि कार्य गर्ने अख्तियारी संचालक समितिलाई दिने, कम्पनीको प्रबन्धपत्र र नियमावलीमा आवश्यक संशोधन गर्ने, थप संशोधन गर्नु परे संचालक समितिलाई अख्तियारी दिने लगायतका विशेष प्रस्ताव पनि सभामा पेश हुने छन् ।
