लक्ष्मी सन्राइज बैंकको सहायक कम्पनी लक्ष्मी लघुवित्त वित्तीय संस्था लिमिटेडले आज आइतबार संचालक समितिका अध्यक्ष अपछ कुमार यादवको अध्यक्षतामा १२औं वार्षिक साधारण सभा सम्पन्न गरेको छ ।
१२औं बार्षिक साधारण सभाले सञ्चालक समितिको तर्फबाट प्रस्तुत भएको आ.व. २०७९/८० को वार्षिक प्रतिवेदन पारीत गरेको छ । कम्पनीको २०८० आषाढ मसान्तमा कायम रहेको चुक्ता पूंजी रु. ४४ करोड १६ लाख ६२ हजार १ सय रहेको छ । आर्थिक मन्दी तथा लघुवित्त संस्था विरुद्ध संचालित कारोवारलाई प्रभाव पार्ने विभिन्न गतिविधिहरुको कारण आ.व. २०७९/८० मा संस्थाको वित्तीय अवस्थामा प्रतिकुल प्रभाव पर्न गै नोक्सान ब्यहोर्नु परेको कारण कायम मुनाफालाई सञ्चित गरी लाभांश वितरण नगर्ने गरी वित्तीय विवरण पारीत गरेको छ ।
सभाबाट अन्य ईजाजतपत्र प्राप्त “घ” वर्गका लघुवित्त वित्तीय संस्थालाई प्राप्ती गर्न उपयुक्त देखिएमा सो सम्बन्धी आवश्यक कार्य अगाडि बढाउन सञ्चालक समिति वा समितिले तोकेका ब्यक्तिलाई अख्तियारी प्रत्यायोजन गर्ने प्रस्ताव लाई समेत निरन्तरता प्रदान गरेको छ ।
साधारणसभामा संस्थाका प्रमुख कार्यकारी अधिकृत सुन्दर प्रसाद श्रेष्ठले वर्तमान अवस्थामा लघुवित्तमा देखिएका समस्या र चुनौतिहरुको समिक्षा गर्दै आगामी दिनमा थप सवल बनाउदै लैजाने प्रतिवद्धता व्यक्त गरेका छन् ।
नेपाल राष्ट्र बैंकबाट मिति २०६८ फाल्गुण २३ गते वित्तीय कारोवार गर्न इजाजतपत्र प्राप्त यस संस्थाले २०६९ जेष्ठ २२ गते नुवाकोटको बट्टारबाट लघुवित्त कारोवार शुरु गरेकोमा हाल आएर देशभर ५६ जिल्लाहरुमा ९० वटा शाखा कार्यालयहरु मार्फत १ लाख ८ हजार भन्दा बढी ग्राहक सदस्यहरुलाई प्रत्यक्ष सेवा पु¥याएको छ । विभिन्न प्रदेशमा ५ वटा प्रादेशिक कार्यालयहरु समेत स्थापना गरेको छ । त्यस्तै गरी संस्थाले २०८० मंसिर मसान्त सम्म ७ अर्ब ४ करोड कर्जा लगानी गरेको छ भने आफ्ना ग्राहक सदस्यहरुबाट २ अर्ब १९ करोड बचत संकलन गरेको छ ।