जीवन जिउन लायक नभएपछि
दोबाटोबाट पतनको मार्ग तिर डोहोरिएपछि
अग्रमनको यात्रामा पूर्णविराम लागेपछि
केही थान मानवका हुलहरु
नागरिकको कर र रेमिट्यान्स डकार्न
सडकमा झरेका छन् !
नारा र जुलसमा
फलानो जिन्दावाद
र,
फलानो मुर्दावाद भन्दै
सडकलाई नीजि सम्पत्ति ठानेर
मजदूरको गाँस खोस्नेहरु
तिमी तानाशाह हौ वा बादशाह
तिम्रो आह्वान र अनुरोध
म र म जस्ता श्रमिहरुले
स्वीकार्ने छैनन् !
तिमी नारा लगाऊ
जुलुस निकाल
टायर बाल
हड्ताल गर
ट्याक्सी जलाऊ
तर, म
तिमी जस्ता बेफ्वाँकका मान्छेहरुको
बेतुकका तर्कमा बर्तन थप्न सक्दिँन !
भोक तिमीलाई पनि लाग्छ
मलाई पनि लाग्छ
आहारा तिमीलाई पनि चाहिन्छ
मलाई पनि चाहिन्छ
फरक यत्ति हो
तिमी सत्ताको भोको छौँ
तिमीलाई त्यसकै आहारा चाहिएको छ
म हररात भोको पेट निदाउँछु
मलाई खाली पेट भर्ने आहारा चाहिएको छ !
मजदूरको गाँस खोसेर मजदूरकै पक्षमा नारा घन्काउनेहरु
कसरी अग्रगामी हुन सक्छन् ?
हो, मेरो मथिङ्गलले यो प्रश्न सोधिरहेको छ
त्यसैले, माफ गर
म तिम्रो आन्दोलनमा आउँन सकिँन
तिम्रा फगत फुस्रा भाषण सुनेर
म मेरी आमाको पेट भोको राख्न सक्दिँन
बाको फाँटेको कमिज टाल्न
मैले हरदिन एक दुई सिक्का जम्मा गर्नुछ
त्यसैले म तिम्रो जुलुसमा आउँन सक्दिँन !
म निर्वाध काम गरिरहन्छु
तिम्रा बज्रस्वाठहरुले
मेरो नाम्लो खोसुन्
मेरो ट्याक्सी जलाउन्
मेरो गाडा भाँचुन
ममाथि लाठी बर्षाउन्
तर, म किञ्चित विलचित हुन्न
म अर्को नाम्लो किन्न सक्छु
म अर्को गाडा जोड्न सक्छु
म लाठी खान तयार छु
तर,
तर, म तिमीहरुजस्ता
बिना एजेण्डामा आन्दोलन गर्नेहरुसँग
हार खान तयार छैन !!