आर्थिक बृद्धिदर सरकारी लक्ष्य भन्दा कम हुने मुद्रा कोषको प्रक्षेपण, मुद्रास्फिती ७.५ प्रतिशत रहने

अन्तराष्ट्रिय मुद्रा कोष (आईएमएफ)ले  नेपालको चालु आर्थिक वर्षको आर्थिक बृद्धिदर सरकारको लक्ष्य भन्दा एक प्रतिशत कम हुने प्रक्षेपण गरेको छ । आईएमएफको आठ सदस्सीय टोलीले जनवरी ११ देखि २३ सम्म नेपालको भ्रमण गरेर अर्थमन्त्री, गभर्नर, निजी क्षेत्र लगायतसँग छलफल गरेर आर्थिक बृद्धिदर ५.५ प्रतिशत हुने प्रक्षेपण गरेको हो । सरकारले आर्थिक वर्ष २०७३/०७४ मा ६.५ प्रतिशत आर्थिक बृद्धि हासिल गर्ने लक्ष्य दिएको छ ।

आइएमएफले यस अघि नेपालको लागि  पाँच प्रतिशत भन्दा तल मात्र आर्थिक बृद्धिदर प्रक्षेपण गर्दै आएको थियो । तर आईएमएफले यो वर्षको राम्रो मनसुन, कृषि उत्पादनमा वृद्धि, चुस्त मौदि्रक नीति, सरकारी खर्च लाई आधारित मानेर ५.५ प्रतिशत आर्थिक वृद्धिद्धर सम्भव रहेको बताएको हो । 

विकास बजेट खर्च नहुनुलाई यसको मुख्य चुनौतीका रुपमा औल्याएको छ । उसले सरकारले बजेट खर्चमा दृढता दिन्छ भन्ने विश्वासका आधारमा यो प्रक्षेपण गरेको समेत प्रष्ट पारेको छ ।  मुद्रास्फिती भने सरकारले भने बमोजिम साढे सात प्रतिशत नै कायम हुने प्रक्षेपण गरेको छ।