सर्बाधिक पुरस्कार राशीको 'धनगढी प्रिमियर लिग' टेलिभिजनमा प्रत्यक्ष प्रशारण हुने भएको छ । आज मंगलबार आयोजक र डिशहोमबिच दुईपक्षीय सम्झौता भएको हो। सम्झौताअनुसार डिस होमले ‘सगरमाथा सिमेन्ट धनगढी प्रिमियर लिग’ क्रिकेट प्रतियोगिताको सम्पूर्ण खेलहरु प्रत्यक्ष प्रसारण गर्नेछ । नेपालको एकमात्र स्पोर्टस् च्यानल डिशहोम स्पोर्टस् च्यानलले प्रतियोगिताको प्रत्यक्ष प्रशारण गर्ने भएको हो । डिशहोम स्पोर्टस् च्यानलले यहि माघ २० गते देखि सिमरामा सञ्चालन हुने ‘रसलान सिमरा गोल्ड कप’ फुुटबल प्रतियोगिताको पनि प्रत्यक्ष प्रशारण गर्ने छ ।
त्यस्तै 'धनगढी प्रिमियर लिग' प्रतियोगिताले सहप्रायोजक पाएको छ । जगशक्ति टिएमटी बार प्रतियोगिताको सह प्रायोजक बनेको हो । यसमा आज मंगलबार सम्झौतामा भएको हो । सम्झौता अनुसार सहप्रायोजकवापत जगशक्तिले डीपीएल आयोजक धनगढी क्रिकेट एकेडेमी (डीसीए) लाई ७ लाख रुपैयाँ प्रदान गर्नेछ ।
धनगढी क्रिकेट एकेडेमी र सुदुरपश्चिमाञ्चल एकेडेमी एसपीएको संयुक्त आयोजनामा हुन् लागेको यस प्रतियोगितामा ६ टोली रहने छन्। चैत ५ गतेदेखि सुरु हुने यस टि २० प्रतियोगिता धनगढीमा खेलाइने छ ।
यस्ता छन् टिम र कप्तान
१. सीवाईसी अत्तरिया (ज्ञानेन्द्र मल्ल)
२. बिराटनगर किंग्स (सरद भेषावकर )
३. काठमाडौँ गोल्डेन्स (वसन्त रेग्मी )
४. रुपन्देही च्यालेन्जर्स (शक्ति गौचन )
५. कंचनपुर आइकोनिक (बिनोद भण्डारी)
६. टिम चौराहा धनगढी (पारस खड्का)
१ करोड ६० लाख लागतमा हुन् लागेको प्रतियोगिताको बिजेताले १५ लाख पाउने छ भने उप बिजेताले ७ लाख पाउने छ । हरेक खेलको म्यान अफ द म्याचले १० हजार, म्यान अफ द सिरिजले मोटरबाइक पाउने आयोजकले जनाएको छ ।
दर्शकले ५० मा टिकट खरिद गर्न सक्ने छन् ।