सरकारले विभिन्न अन्तराष्ट्रिय खुलकुद प्रतियोगितामा पदक विजेता खेलाडीहरुलाई पुरस्कृत गर्ने निर्णय गरेको छ । आज बसेको मन्त्रिपरिषद्को बैठकले ४२ जना खेलाडी र प्रशिक्षकहरुलाई दुई करोड ९७ लाखभन्दा बढी रुपैयाँले पुरस्कृत गर्ने निर्णय गरेको हो।
युवा तथा खेलकुद मन्त्रालयको प्रस्तावमा यो निर्णय भएको हो । जस अनुसार १९औं एसियन खेलकूदमा पदक विजेता, क्रिकेट टिम र पारा तेक्वान्दो खेलाडी तथा प्रशिक्षकले नगद पुरस्कार पाउने छन्।
कुल रकम मध्ये आइसिसी मेन्स टि-ट्वान्टी वल्ड कप फाइनल एसियामा दोस्रो भएको राष्ट्रिय क्रिकेट टिमले दुई करोड ४ लाख ७५ हजार रुपैयाँ पुरस्कार प्राप्त गर्ने छ । १५ खेलाडीलाई जनही १३ लाख, प्रमुख प्रशिक्षक मोन्टी देशाईले ३ लाख ९० हजार, टिम व्यवस्थापक सुमनराज कार्की, सहायक प्रशिक्षक वसन्त शाही र फिजियो विक्रम न्यौपानेले जनही १ लाख ९५ हजार रुपैयाँ नगद पुरस्कार प्राप्त गर्ने बताईएको छ ।