अर्जेन्टिना तथा बार्सिलोनाका फरवार्ड सर्जियो अगुएरोले सबै खालका खेलबाट सन्यास लिने भएका छन् । मुटुमा समस्या देखिएपछि पछिल्लो तीन महिना मैदान बाहिर नियमित उपचार गराएपनि फुटबलबाटै सन्न्यास लिने स्थितिमा पुगेका हुन् ।
बुधबार उनले फुटबलबाट सन्यास लिने सम्भावना छ ।
गत अक्टावेर ३० मा स्पेनिस ला लिगामा एलाभेसविरुद्धको खेलपछि उनी मैदान बाहिर छन् । त्यतिबेला ३ महिना मैदान बाहिर रहने बताइएपनि अहिले आएर उनले फुटबलबाटै बाहिरिने अवस्था आउन लागको हो ।
३३ वर्षीय अगुएरो यसै समरमा इंग्लिस क्लब म्यानचेस्टर सिटीबाट बार्सिलोना गएका थिए । खेल समाचार एजेन्सीले बताए अनुसार बार्सिलोनाले अगुएरोलाई बिदाई दिने तयारी गरेको छ ।
बार्सिलोनामा उनले यो सिजन पाँच खेलमा एक गोल गरेका छन् । उनले म्यानचेस्टर सिटीका लागि ३९० खेलमा २६० गोल गरेका छन् । स्पेनिस क्लब एट्लेटिको म्याड्रिडका लागि २३४ खेलमा १०२ तथा अर्जेन्टिना प्रिमेरा लिगमा इन्डिपेन्डिन्टेका लागि ५६ खेलमा २३ गोल गरेका छन् । उनले अर्जेन्टिनाका लागि १०१ खेलमा ४१ गोल गरेका छन् ।
म्यानचेस्टर सिटीबाट ५ पटक प्रिमियर लिग, ६ पटक इएफएल कप, ४ पटक कम्युनिटी शिल्ड र १ पटक एफए कप जितेका अगुएरोले एट्लेटिको म्याड्रिडबाट १ पटक युरोपा लिग र सुपर कप जितेका छन् ।