उपाधि दाबेदार नेपालले आइसिसी यू–१९ विश्वकप एसिया क्षेत्र छनोटमा सिंगापुरमाथि ९६ रनको सानदार जित निकाल्दै विजयी सुरुवात गरेको छ । जितको लागि २६२ रनको विजयी लक्ष्य पछ्याएको सिंगापुरले निर्धारित ५० ओभरमा ७ विकेट गुमाउँदै १६५ रन मात्रै बनाउन सक्यो ।
टस जितेर पहिला ब्याटिङको रोजेको नेपालले ५० ओभरमा ७ विकेट गुमाउँदै २६१ रन बनाएको थियो । नेपालको जितमा ब्याट्सम्यान आकाश त्रिपाठीले १ सय बलमा ७ चौका र १ छक्कासहित सर्वाधिक ७८ रनको योगदान दिए । आकाशको डेब्यू खेल हो ।
विशाल विक्रम केसी ५४ बलमा ४ चौका र २ छक्कासहित ६३ रनमा अविजित रहे । विशालले ४५ बलमा अर्धशतक पूरा गरेका थिए ।
दोस्रो विकेटका लागि अर्जुन कुमाल र आकाशले ९३ रनको साझेदारी गर्दै नेपालका लागि राम्रो योगफलको आधार तय गरे । अर्जुन कुमाल ६७ बलमा ३ चौकासहित ३७ रन जोड्दै बोल्ड आउट हुन पुगेका थिए । कप्तान देव खनाल २६ बलमा १ चौकासहित २१ रनमा आउट भए ।
डेब्यू खेल खेलेका दीपक बोहरा पनि १५ बलमा २ चौका हिर्काएर १७ रनमा बोल्ड हुन पुगे । ओपनर दीपक बोहराले ५ रन बनाए । विकेटकिपर दीपक डुम्रे १० र मिलन बोहरा ४ रनमा आउट भए । सुवास भण्डारी ८ बलमा १ चौकासहित १२ रनमा अविजित रहे ।
प्रतियोगितामा नेपाल, हङकङ, मलेसिया, सिंगापुर, युएई र कुवेत छन् । सिंगल राउन्ड रोविनको आधारमा हुने प्रतियोगिताको विजेताले २०२४ मा श्रीलंकामा हुने यू–१९ विश्वकप खेल्न पाउनेछ ।
नेपालले अब शुक्रबार कुवेतसँग र फागुन १५ (फेब्रुअरी २७) मा हङकङसँग खेल्नेछ ।
फागुन १६ (फेब्रुअरी २८) मा मलेसियासँग खेल्ने नेपालले आफ्नो अन्तिम खेल यूएईसँग फागुन १८ (मार्च २) मा खेल्नेछ ।