अफ्रिकी देशका नागरिकलाई नेपाल प्रवेशमा रोक लगाईएको छ । कोरोना भाइरसको नयाँ भेरिएन्ट ‘ओमिक्रोन’को संक्रमण भित्रिन नदिन दक्षिण अफ्रिकी देशका नागरिकलाई प्रवेशमा रोक लगाईएको हो ।
गृह मन्त्रालयले अध्यागमन विभाग, त्रिभुवन विमानस्थल कार्यालय र सीमा क्षेत्रका प्रशासन कार्यालयलाई अफ्रिकी देशका नागरिकहरुलाई प्रवेश गर्न नदिने व्यवस्था मिलाउन आइतबार निर्देशन दिएको छ । कूटनीतिक, अफिसियल र आपतकालीन काम भएकाबाहेक सबै अफ्रिकी देशका नागरिकलाई अर्को व्यवस्था नभएसम्मका लागि नेपाल प्रवेशमा रोक लगाइएको गृह मन्त्रालयका प्रवक्ता फणीन्द्रमणि पोखरेलले जानकारी दिए ।
गृह मन्त्रालयले अफ्रिकी देश हुँदै यात्रा गरेका अन्य देशका नागरिकलाई पनि कोरोना परीक्षणको रिपोर्टका आधारमा मात्रै आवश्यक निर्णय लिन पनि निर्देशन दिएको छ ।
