भारतीय विमान सेवा प्रदायक कम्पनी एयर इन्डिया एक्सप्रेस एयरलाइन्सले सामूहिक बिदामा गएका कर्मचारीहरूलाई बर्खास्त गरेको छ ।
हालसम्म विमान कम्पनीले ३० भन्दा बढी बरिष्ठ कर्मचारीलाई निष्कासन गरेको बताइएको छ । अत्यावश्यक सेवामा नियतबश हड्ताल गरेको भन्दै सो विमान कम्पनीले कर्मचारीहरु प्रति कडा व्यवहार अपनाएको छ ।
जसअनुरुप कर्मचारीहरु बर्खास्तमा परेका हुन् । एयर इन्डिया र एयर इन्डिया एक्सप्रेस एयरलाइन्सका सिनियर क्रुसहित १०० भन्दा बढी कर्मचारीले सांकेतिक विरोध जनाउँदै अचानक बिरामी बिदा लिंदा मंगलबार र बुधबार ९० भन्दा बढी उडान रद्द भएका थिए । बिहीबार पनि ७४ वटा उडान रद्द भएका छन् ।
कर्मचारीले सामूहिक बिदा लिएपछि एयर इन्डिया एक्सप्रेसका धेरै उडान रद्द गर्नुपरेको थियो । यसका कारण हवाई यात्रुहरूले निकै सास्ती खेप्नु परेको थियो ।एयर इन्डिया र एयर इन्डिया एक्सप्रेस एयरलाइन्स एकापसमा विलय हुन लागेका छन् । जसका कारण दुवै एयरलाइन्सका कर्मचारीहरू आफ्नो जागिर धरापमा पर्न लागेको भन्दै असन्तुष्ट छन् ।
टाटा समूहको स्वामित्वमा रहेको एयर इन्डिया एक्सप्रेसका सिनियर केबिन क्रूले एकै साथ सामुहिक विदा लिएपछि अन्तरराष्ट्रिय र घरेलु उडानहरु रद्द छन् । जसका कारण हवाई यात्रुहरूले निकै सास्ती खेप्नु परेको छ । विमान कम्पनीले उडान कटौती मे १४ सम्म जारी रहन सक्ने उल्लेख गरेका छन् ।
भारतीय समाचार एजेन्सीका अनुसार उडान रद्द हुँदा करिब १५ हजार यात्रु प्रभावित भएका थिए । केबिन क्रुको अभावका कारण भारतबाट खाडी मुलुक जाने धेरै उडान रद्द छन् । एयर इन्डिया एक्सप्रेसले घरेलु र अन्तरराष्ट्रिय रूटमा करिब ३६० ओटा उडान सञ्चालन गर्छ ।एयर इन्डिया एक्सप्रेसको केबिन क्रूको कर्मचारी सङ्गठनले कम्पनीमाथि कुव्यवस्थापन र असमान व्यवहार गरेको आरोप लगाएको छ ।
यसैबीच, सरकारले पनि यसबारेमा विमान कम्पनीसँग स्पष्टीकरण मागेको छ । साथै सरकारले यस्तो खालको विवाद तुरुन्त समाधान गर्न पनि भनेको छ । एजेन्सी