आँखुखोला हाइड्रो पावरले स्थानीयको लागि निष्काशन गरेको आईपिओमा आवेदन दिने आज भदौ १५ गते अन्तिम दिन रहेको छ । कम्पनीले साउन १७ गतेदेखि आयोजना प्रभावित धादिङका स्थानीयहरूलाई साधारण सेयर (आइपीओ) बिक्रि खुला गरेको थियो। कम्पनीले स्थानीय बासिन्दाका लागि ८ करोड रुपैयाँ बराबरको ८ लाख कित्ता आइपिओको निष्काशन गरेको हो।
लगानीकर्ताले न्युनतम ५० कित्ता र अधिकतम ४ हजार कित्ता सम्मका लागि आवेदन दिन सक्ने छन।इच्छुक स्थानीयबासिले धादिङमा रहेका मुक्तिनाथ विकास बैंक, सिभिल बैंक र प्रभु बैंकका शाखा कार्यालय मार्फत आवेदन दिन सक्नेछन। साथै आँखुखोला हाइड्रो पावर कम्पनीको आयोजना स्थलको कार्यालय त्रिपुरासुन्दरी गाँउपालिका ४ रिङनेबजारमा पनि आवेदन दिन सकिने बिक्रि प्रबन्धक सिभिल क्यापिटल मार्केटले जनाएको छ ।
इक्रा नेपालले आँखुखोला जलविद्युत कम्पनी लिमीटेडको आर्इपिओ ग्रेड फाइभको ग्रेडिङ्ग प्रदान गरेको छ । यसले कम्पनीको अवस्था औसत भन्दा कमजोर रहेको जनाउँछ । कम्पनीले स्थानीयलाई शेयर बिक्री गरेपछि आम सर्वसाधारणका लागि १२ करोड बराबरको १२ लाख कित्ता आर्इपिओ जारी गर्नेछ ।
आयोजनाको कुल लागत २४२.७३ करोड छ। जस अनुसार प्रति मेगावाट लागत २८.८९ करोड देखिन्छ। आयोजनामा साधारण लगानी फिर्ता हुने समयअवधि करिब ९ बर्ष रहेको छ।
