नयाँ मन्त्रीहरुको सपथ ग्रहणको लागि राष्ट्रपति कार्यालय शितल निवास तयारी अवस्थामा रहेको छ । प्रधानमन्त्री केपी शर्माले आज बुधबार मन्त्रिपरिषद पुनर्गठन गर्ने तयारी गरेका छन् । उनले केहिलाई हटाउने, केहिको मन्त्रालय हेरफेर गर्ने र केहि नयाँ अनुहारलाई मन्त्रिपरिषदमा स्थान दिने तयारी गरेका छन् ।
नयाँ मन्त्रीहरुको सपथ ग्रहणको जानकारी औपचारिक रुपमा नआएको भएपनि राष्ट्रपति कार्यालय तयारी अवस्थामा छ । बेलुका ११ बजे भए पनि राष्ट्रपति कार्यालय सपथको कार्यक्रमको लागि तयार रहेको राष्ट्रपति कार्यालयका सहायक प्रवक्ता एवम् उप-सचिव केशवप्रसाद घिमिरेले बताएका छन् । उनका अनुसार जुनसुकै मेला सपथग्रहणको कार्यक्रम गर्न कार्यालय तयार छ ।
मन्त्रिपरिषद हेरफेरबारे नेकपाका अध्यक्षद्वय ओली र प्रचण्डले बिहान वान टु वान छलफल गरेका थिए भने त्यसपछि राष्ट्रपतिसंग शितल निवासमा पुगेर परामर्श लिएका थिए । अहिले मन्त्रिपरिषद हेरफेरको अन्तिम टुंगो लगाउन नेकपाको सचिवालय बैठक जारि छ । बैठक सकिएपछि प्रधानमन्त्री ओलीले मन्त्रिपरिषद पुनर्गठन गर्ने र उनीहरुको सपथ आज नै गर्ने तयारी छ ।
