अन्तराष्ट्रिय हवाइ उडानको संख्या थप भएको छ । नेपाल नागरिक उड्डयन प्राधिकरणले सातामा ५३ उडान हुने गरी संख्या थपिएको जनाएको छ ।
यसअघि सातामा २४ उडान मात्रै हुँदै आएकोमा श्रमिकहरु जाने गन्तव्यमा उडान संख्या थप गर्न माग भए अनुसार नयाँ तालिका निकालिएको प्राधिकरणले जनाएको छ ।
नयाँ तालिका अनुसार भारतको राजधानी नयाँ दिल्लीमा भने हप्तामा २ उडान मात्रै हुनेछन् । २ उडानमध्ये बुधबार उडान नेपाल एयरलाइन्सले र सोमबार एयर इण्डियाले उडान गर्नेछन् ।
दुबईमा नेपाल एयरलाइन्सले मंगलबार र बिहीबार, हिमालय एयरलाइन्सले आइतबार, मंगलबार र बिहीबार र फ्लाइ दुबइले आइतबार, बुधबार र शुक्रबार उडान गर्ने भएका छन् ।
दोहा कतारमा नेपाल एयरलाइन्स र कतार एयरवेजले हरेक दिन एक एक उडान गर्ने छन् भने हिमालय एयरलाइन्सले सोमबार, बुधबार र शनिबार उडान गर्न पाउने भएको छ ।
साउदीको दमाममा हिमालय एयरलाइन्सले आइतबार, सोमबार, बुधबार र शुक्रबार उडान गर्नेछ ।
मलेसियाको क्वालालाम्पुरमा नेपाल एयरलाइन्सले बुधबार र शनिबार उडान गर्दा हिमालय एयरलाइन्सले बिहीबार, शुक्रबार र शनिबार उडान गर्न पाउने गरी नयाँ तालिका आएको छ ।
टर्किस एयरलाइन्सले सोमबार, बिहीबार र शनिबार काठमाडौँ–इस्तानवुल उडान गर्नेछ ।
जजिरा एयरवेजले कुवेतमा सोमबार, मंगलबार, बुधबार, बिहीबार र शनिबार जहाज उडाउनेछ । सलाम एयरले ओमानको मस्कटमा सोमबार, बुधबार र शनिबार उडान गर्ने गरि अनुमति पाएको छ ।
एयर अरेबियाले आबुधाबीमा आइतबार र मंगलबार जहाज उडाउँदा सिंगापुर एयर आइतबार काठमाडौं आउन पाउने भएको छ ।