कृषि विकास बैंकले सरकारले कोरोना रोकथाम तथा नियन्त्रणका लागि खडा गरेको कोरोना नियन्त्रण कोषमा १ करोड २५ लाख आर्थिक सहयोग गरेको छ।
कोरोनाका कारण देशको अर्थतन्त्रमा असर पर्न सक्ने र त्यसका लागि पूर्वाधार निर्माण पनि गर्नुपर्ने भएकाले ठुलो राशिको आवश्यक पर्ने भन्दै सरकारले खडा गरेको कोषलाई सहयोग गर्न उक्त रकम सहयोग गरिएको बैंकले जनाएको छ।
कोभिड–१९ कोरोना नामक भाइरससँग सावधानीपूर्वक डटेर सामाना गर्नका लागि व्यक्तिगत सुरक्षा सामग्री, स्वास्थ्य उपकरण, नमूना परीक्षण किट र क्वारेन्टाइन लगायत अत्यावश्यक सामग्री स्वास्थ्य व्यवस्थाको उचित प्रबन्ध मिलाउन सरकारद्वारा स्थापना गरिएको कोरोना संक्रमण रोकथाम तथा नियन्त्रण कोषमा कृषि विकास बैंकले आर्थिक सहयोग स्वरुप उपलव्ध गराएको हो।
कोभिड–१९ ले आम विश्वसमुदायलाई त्रसित बनाइरहेको अवस्थामा नेपाल र नेपाली जनता पनि उच्च जोखिममा रहेको यस विपतको घडीमा यो भाइरसविरुद्ध लड्नका लागि आफूहरुले सहयोग गरेको बैंकले जनाएको छ।
यो विपतको कारणबाट ज्यान गुमाउनेहरुप्रति बैंकले चिर शान्तिको कामना गर्दै बिरामीहरुको शिघ्र स्वास्थ्यको लाभको कामना समेत गरेको छ।