ललितपुरका २ सहकारीले आफूविरुद्ध भ्रामक समाचार प्रकाशित गरेको भन्दै जनरक्षा साप्ताहिक (जनरक्षा डटकम) विरुद्ध प्रेस काउन्सिलमा उजुरी दिएका छन् ।
पाथीभरा बचत तथा ऋण सहकारी संस्था र गोल्डेन गेट बहुउद्देश्यीय सहकारी संस्था काउन्सिलमा लिखित उजुरी दिएका हुन् । यी २ सहकारीले अलग अलग रूपमा दिएको निवेदन काउन्सिलले दर्ता गरी आवश्यक प्रक्रिया सुरु गरिसकेको छ ।
सहकारीहरुले समाचारको सत्य तथ्य छानबिन गरी भ्रामक समाचार छाप्ने अनलाइनमाथि आवश्यक कारबाहीको माग गरेका छन् ।
जनरक्षा डटकमले पाथिभरा बचत तथा ऋण सहकारी संस्थाका कार्यवाहक अध्यक्ष अनुप न्यौपाने र गोल्डेन गेट सहकारीका अध्यक्ष विजय श्रेष्ठसहित सञ्चालकहरुको नाम जोडेर भ्रामक समाचार प्रकाशित गरेको थियो ।
उक्त समाचार आफ्नै व्यवसायिक प्रतिस्पर्धीले लेखाएको दाबी यी २ सहकारीले गरेका छन् ।