नवलपरासी क्षेत्र नम्बर २ को प्रदेश (क)का
स्वतन्त्र उम्मेदवार खड्ग बस्नेत प्रदेशस्तरमा बन्ने नीति नियम र कार्यक्रमहरूलाई
युवामैत्री बनाउन आफूले स्वतन्त्र उम्मेदवारी दिएको बताएका छन् ।
ग्राउण्ड जिरो रिपोर्टिङका क्रममा
रहेको बिजपाटी टीमसँग संक्षिप्त कुराकानी गर्दै बस्नेतले आफ्नो क्षेत्रको विकास
निर्माणलाई पारदर्शी बनाउने र दीगो विकाससँग सम्बन्धित गराउने गरी आफूले राजनीतिमा
भूमिका खोजेको बताएका हुन् ।
'युवाहरूलाई सामाजिक र राजनीतिमा
स्थापित गर्नुपर्छ भन्न एउटा उदाहरण सेट गर्न मैले उम्मेदवारी दिएको हुँ,' बस्नेतले
भने, 'प्रदेश स्तरमा बन्ने नीति नियमहरू र अन्य कार्यक्रमहरूलाई युवामैत्री
बनाउनुपर्छ । म त्यसैका लागि प्रयासरत छु ।'
उनले थपे, 'यहाँका युवाहरू बेरोजगार
हुने र त्यसका कारणले विभिन्न कूलतमा लाग्ने र त्यो ऊर्जाशील समय खेर जाने समस्या रहेको
छ । यसलाई समाधान गर्नका लागि स्थानीय अर्थतन्त्रलाई बलियो बनाउने, यहाँका युवाहरूलाई उद्यमी बनाउनका लागि नीति
निर्माण तहमै हस्तक्षेप हुनुपर्छ र म त्यो गर्छु ।'
उनले उद्यमी बन्न चाहने युवाहरूलाई
सीड मनीको व्यवस्था गर्ने, त्यसलाई निगरानी गर्ने र उनीहरूले गर्न खोजेको कामको
पर्पोजलका आधारमा लगानी लगाउने र व्यवसायीक बनाउने गरी योजनालाई अगाडि सार्ने गरी आफूले
काम गर्ने उनको भनाइ छ ।
यसअघि माओवादी केन्द्रसँग आबद्ध भएर
सामाजिक र राजनीतिक काममा होमिएका बस्नेत गठबन्धनको आधिकारिक उम्मेदवार थिए । तर मनोनयनको
दिन चिनक कुर्मीलाई माओवादीले अघि सार्यो ।
सुनवल नगर कमिटीको अध्यक्षसमेत रहेका
बस्नेतले पार्टीले पछि हट्न भनेपनि स्वतन्त्र रूपमा मनोनयन दर्ता गराए । उनी आफू
कसैको प्रतिस्पर्धी नभएको दाबी गर्छन् । आयोगले उनलाई धारा निर्वाचन चिह्न दिएको छ
।
'मेरो प्रतिस्पर्धी छैन,' उनले भने,
'म कसैलाई हराउन पनि आएको होइन । मैले मतदातासँग सबैलाई जिताइदिनुस, तर मलाई एक नम्बरमा राखिदिनुस भनेको छु ।
पार्टीले गरेको निर्णयप्रति मेरो आपत्ति पनि छैन ।'
हेर्नुहोस् भिडियो -