प्रतिनिधि सभा निर्वाचन क्षेत्र नं.३ की उम्मेदवार डा. तोसिमा कार्कीको उम्मेदवारी खारेज गर्न माग गर्दै निर्वाचन आयोगले सर्वोच्च अदालतमा दायर गरेको रिटमा आज सुनुवाई हुदै छ । आज न्यायधीशद्वय ईश्वरप्रसाद खतिवडा र तिलप्रसाद श्रेष्ठको संयुक्त इजलाशमा यस मुद्दाको सुनुवाई हुन लागेको हो ।
यो रिटको पेशी उक्त इजलाशको पहिलो नम्बर मै तोकिएकोले आज यस मुद्दामा आदेश आउने निश्चित जस्तै छ । यस अघि लगातार ३ पटक यो मुद्दाको पेशी तोकिए पनि 'हेर्न नभ्याईने' मा पर्दै स्थगित भएको थियो ।
डा, कार्कीको उमेदवारी कायम राख्न सर्वोच्च अदालतले दिएको आदेश बदर गर्न माग गर्दै निर्वाचन आयोगले सर्वोच्च अदालतमा निवेदन दिएको हो । सर्वोच्चका न्यायधिश डा. कुमार चुडालको एकल इजलाशले डा. तोसिमा कार्कीको उम्मेदवारी खारेज गर्ने निर्वाचन आयोगको निर्णय कार्यन्वयन नगर्न र उनको उम्मेदवारी कायम राख्न अन्तरिम आदेश दिएको थियो ।
आयोगले सोहि आदेश विरुद्द सर्वोच्चमा निवेदन दिएको हो । आयोगले भनेको छ ' ललितपुर जिल्ला क्षेत्र नं.३ बाट पहिलो हुने निर्वाचित हुने निर्वाचन प्रणालीतर्फ प्रतिनिधिसभा सदस्य उम्मेदवार डा.तोसिमा कार्कीको उम्मेदवारीका विषयमा सर्वोच्च अदालतबाट २०७९।७।१५ मा भएको अन्तरिम आदेश बदर गरीपाउँ भनी शुक्रबार निर्वाचन आयोगले सर्वोच्च अदालतमा निवेदन गरेको छ।'
निर्वाचन आयोगले लाभको पदमा रहेको भन्दै आफ्नो उम्मेदवारी खारेज गरिदिएपछि डा. तोसिमा कार्कीले सर्वोच्च अदालतमा रिट दायर गरेकी थिइन्। उनले निर्वाचन आयोग नेपाल कान्तिपथ काठमाडौ , मुख्य निर्वाचन अधिकृतको कार्यालय ललितपुर जिल्ला प्रतिनिधि सभा निर्वाचन क्षेत्र नं.३ र नेपाल मेडिकल काउन्सिल बाँसबारी काठमाडौलाई विपक्षी बनाएर रिट दायर गरेकी थिइन्।
