जग्गाको कित्ताकाट खोल्ने र रोक्का गर्ने क्रमका कारण घरजग्गा व्यवसाय प्रभावित बनेको छ । सरकारले मन्त्रिपरिषदबाटै निर्णय गरेर कित्ताकाट खोल्ने निर्णय गरेको भएपनि कार्यान्वयन नै नगरी फेरी अर्को प्रस्तावका लागि भूमी व्यवस्था मन्त्रालयमै फर्काएको छ । यस्तो अस्थिर नीतिका कारण घरजग्गा व्यवसाय अस्तव्यस्त बनेको छ ।
जसका कारण वैशाखमा घरजग्गा कारोबार घटेको छ । सँगै, लिखत पारित र घरजग्गा कारोबारबाट हुने राजस्व संकलन पनि बैशाख महिनामा घटेको छ ।
भूमि व्यवस्थापन तथा अभिलेख विभागका अनुसार देशभरका मालपोत कार्यालयहरुबाट वैशाख महिनामा ४२ हजार ४६१ लिखत पारित भएको छ । यो चैतको तुलनामा ६ हजारभन्दा बढीले कम हो । चैतमा ४९ हजार १५० घरजग्गा कारोबार भएको थियो ।
वैशाखमा भएका घरजग्गा कारोबारबाट सरकारले ३ अर्ब ६८ करोड रुपैयाँ राजस्व संकलन गरेको छ । चैतमा ४ अर्ब ५१ करोड रुपैयाँ राजस्व सङ्कलन भएको थियो ।