रामपुरका च्याउ व्यवसायी कृषक बलबहादुर राना एक याममा च्याउ बेचेर चार लाख रुपैयाँ बराबरको आम्दानी गर्छन्। विदेशबाट फर्केर उनले विगत पाँच वर्ष अगाडिदेखि व्यावसायिक रुपमा च्याउ खेती सुरु गरेका हुन्।
सुरुमा डेढ सय बल्बबाट व्यवसाय सुरु गरेका रानाले अहिले एक हजार बल्बमा च्याउ खेती बिस्तार गरेका छन्। च्याउबाट मनग्य आम्दानी हुँदै गएपछि उनले व्यवसाय पनि बढाएका छन्।
सुरुमा एउटा गोठमा परीक्षणका रुपमा च्याउ खेती गरेका रानाले उत्पादन बढ्दै गएपछि पछिल्लो समय विस्तार गर्दै लिएका छन्। अहिले उनले छ वटा गोठमा एक हजार बल्बमा च्याउ राखेर यसवर्ष झन्डै सात लाख बराबरको आम्दानी गर्ने लक्ष्य लिएको बताए।
“धन कमाउन विदेश गए, राम्रो कमाउन सकिनँ, घर फर्केर च्याउ खेती सुरु गरेँ”, “जसरी च्याउ उम्रिन्छ त्यसरी नै पैसा दिनहुँ हातमा परिरहेको छ” – रानाले भने।
च्याउ खेतीबाटै नाम र प्रतिष्ठा कमाएका राना हिजोआज बलबहादुरको सट्टा च्याउवालाका नामले चिनिन थालेका छन्। अहिले प्रतिकिलो २०० मा घरबाटै च्याउ बिक्री भइरहेको छ । अहिलेसम्म यस व्यवसायमा गोठ निर्माण र प्लास्टिक खरिदमा रु एक लाख बराबरको लगानी परेको उनको भनाइ छ ।
च्याउ उम्रन नपाउँदै धैरैले पहिलेदेखि नै बैना गर्ने गरेको रानाले बताए। दिनमा उनले झन्डै २० देखि ३० किलोसम्म च्याउ बिक्री गर्छन्। च्याउको माग बढ्दो रहेकाले अब सिताके च्याउ पनि सुरु गर्ने र यस व्यवसायलाई बढाउने सोचमा रहेको बताए।
थोरै लगानीमा कम मेहनतमा घरमै बसी बसी च्याउ बेचेर एक याममा लाखौँ आम्दानी लिन सकिन्छ । एक बल्बबाट तीन चारपटकसम्म च्याउ टिप्न सकिने भएपछि हिजोआज च्याउको उत्पादन जिल्लामा बढ्दै गएको छ ।