काठमाडौँ महानगरपालिकाको २७ औँ महानगर दिवसको अवसरमा आयोजित मेयर–११ र प्रमुख प्रशासकीय अधिकृत–११ बीचको मैत्री फुटबल खेल बराबरीमा सकिएको छ ।
काठमाडौँ महानगरपालिकाका प्रमुख विद्यासुन्दर शाक्यले नेतृत्व गरेको जनप्रतिनिधिको टिम र प्रमुख प्रशासकीय अधिकृत राजेश्वर ज्ञवालीले नेतृत्व गरेको कर्मचारीको टिम बीचको खेल ३–३ को बराबरीमा सकिएको हो ।
दशरथ रंगशालामा सम्पन्न खेलमा सुरुमा कर्मचारीको टिम हावी भएको थियो । खेलको सुरुवाती चरणमै कर्मचारीका तर्फबाट सीमन केसीले पहिलो गोल गरेर अग्रता दिलाएका थिए । त्यसको केही समयपछि जनप्रतिनिधिका तर्फका खेलाडीले डी एरिया भित्रै हेण्ड गरेपछि कर्मचारीकै तर्फबाट सुन्दर हमालले पेनाल्टीमार्फत गोल गर्दै २–० अग्रता दिलाएका थिए ।
खेलको पहिलो हाफ अघि मैदान प्रवेश गरेका वडा–६ का अध्यक्ष दीपेन्द्र लामाले जनप्रतिनिधिका तर्फबाट सुरुवाती गोल गरे । त्यसपछि लगत्तै वडा–३ का सदस्य प्रेम थापाले जनप्रतिनिधिका लागि दोस्रो गोल गरेपछि खेल पहिलो हाफमा २–२ को बराबरी भएको थियो ।
दोस्रो हाफको सुरुवातीमै फेरि कर्मचारीका तर्फबाट सीमन केसीले टिमका तेस्रो गोल गर्दै अग्रता दिलाए । तर, खेलको अन्त्यतिर जनप्रतिनिधिका तर्फबाट प्रेम थापाले तेस्रो गोल गरेपछि खेल बराबरीमा टुंगियो ।
खेल सुरु सुरु हुनु अघि राष्ट्रिय खेलकुद परिषद्का सदस्य सचिव टंकलाल घिसिङले मैत्रीपूर्ण खेलका लागि काठमाडौँ महानगरपालिकाका प्रमुख शाक्यलाई फुटबल हस्तान्तरण गरेका थिए ।
खेल समापनपछि प्रमुख शाक्यले जनप्रतिनिधि र कर्मचारीबीच खेलमा जस्तै महानगरपालिकाका विकास निर्माणका काममा मैत्रीपूर्ण सम्वन्ध रहँदा सेवा प्रवाहमा सहज हुने बताए । प्रमुख प्रशासकीय अघिकृत ज्ञवालीले पनि जनप्रतिनिधि र कर्मचारीबीच नङ र मासुको सम्वन्ध रहनु पर्नेमा जोड दिए ।