भारतले नेपाललाई दिने सहयोग घटाएको छ । भारतीय वित्त मन्त्री निर्मला सितारमणले आज भारतको आर्थिक वर्ष २०२३/२४ को वार्षिक बजेट पेश गरेकी हुन्। जसमा भारतले नेपाललाई दिने सहयोग कटौती गरिएको हो ।
यस वर्ष भारतले नेपाललाई ५ अर्ब ५० करोड भारु दिने उल्लेख गरेको छ , जुन अघिल्लो वर्षको तुलनामा २ अर्ब कम हो। गत वर्ष भारतले नेपाललाई ७ अर्ब ५० करोड दिने उल्लेख गरेको थियो । तर ४ अर्ब २५ करोड मात्र दिएको थियो ।
भारतले भुटानलाई सबैभन्दा धेरै २४ अर्ब दिने भएको छ । त्यस्तै मोरिससलिई ४ अर्ब ६० करोड, माल्दिभ्सलाई ४ अर्ब, म्यान्मारलाई ४ अर्ब, अफगानिस्तानलाई २ अर्ब, बंगलादेशलाई २ अर्ब, तथा श्रीलंकालाई डेढ अर्ब दिने उल्लेख गरेको छ ।
भारतले भुटान र माल्दिभ्सलाई दिने सहयोग बढाएको हो । अफगानिस्तानलाई दिने सहयोगमा घटबढ गरेको छैन । तर नेपाल, श्रीलंका तथा म्यान्मारलाई दिने सहयोग भने घटाएको हो ।
भारतीय वित्त मन्त्री निर्मला सितारमणले आज पेश गरेको बजेट भारतीय प्रधानमन्त्री नरेन्द्र मोदीको कार्यकालको अन्तिम पूर्ण बजेट हो । भारतमा सन् २०२४ मा आम चुनाव हुँदै छ । सो समय चुनावी बजेट मात्र आउने भएकोले यो मोदी सरकारको अन्तिम पूर्ण बजेट हो। बित्त मन्त्री निर्मलाको यो पाचौ बजेट हो ।
भारतमा आर्थिक वर्ष अप्रिल १ मा सुरु भई मार्च ३१ सम्म चल्छ ।