इटालीमा एक १०१ वर्षे बृद्ध कोरोना भाइरस बिरुद्दको लडाई जितेर घर फर्किएका छन् । कोरोनाको संक्रमणपछि अस्पताल भर्ना भएका ति बृद्ध उपचारपछि निको भएर बिहिबार घर फर्केका हुन् ।
इटालीयान संचार माध्यमहरुले उनको नाम मिस्टर पी मात्र उल्लेख गरेका छन् । गत हप्ता उनी रिमिनी अस्पतालमा भर्ना भएका थिए ।
उनले दोस्रो महामारीलाई परास्त गरेका हुन् । उनी जन्मेकै वर्ष सन् १९१९ मा स्पेनिस फ्लु नामको माहामारी फैलिएको थियो । उक्त फ्लुबाट त्यससमय विश्वको एक तिहाई जनसख्या संक्रमण गरेको बताईएको छ । स्पेनिस फ्लुलाई जितेका उनले अहिले कोरोना भाइरसको माहामारीलाई पनि परास्त गरेका हुन् ।
कोरोनाबाट मृत्यु हुनेमा अधिकाशं ६० वर्ष भन्दा बढीका मानिस रहेकोमा १०१ वर्षे यी बृद्धले स्वास्थ्यलाभ पाउनुलाई चमत्कारिक रुपमा हेरिएको छ । यस अघि चीनको वुहानमा पनि यस्तै घटना भएको थियो । त्यहाँ कोरोना लागेकी १०३ वर्षे बृद्धा उपचारपछि निको भएर घर फर्किएकी थिइन् ।
