सानिमा जनरल इन्स्योरेन्स Sanima General Insurance Company ले निष्काशन गरेको आईपिओमा बाँडफाँड भएको छ । बिक्रि प्रबन्धक एनआईसी एसिया क्यापिटलले शुक्रबार बिहान क्यापिटल कै कार्यालयमा फेसबुक लाइभ मार्फत आईपिओ बाँडफाँड गरेको हो ।
आईपिओमा ८ लाख ६६ हजार ९ सय ५ जनाले आवेदन दिएकोमा ३ हजार ३ सय ६० जनाको आवेदन रद्द भएको क्यापिटलले जनाएको छ । बाँकि रहेका ८ लाख ६३ हजार ५ सय ४५ योग्य आवेदक मध्ये गोलाप्रथाबाट २ लाख ७३ हजार जनाले समान १० कित्ता शेयर पाएका छन् । यस हिसाबमा आवेदन दिएका मध्ये ५ लाख ९३ हजार आवेदक हात खाली भएका छन् । आईपिओमा ६.८१ गुणा बढी आवेदन परेको थियो ।
कम्पनीले असोज २१ गतेदेखि प्रति शेयर १ सय अंकित दरले हुने ३० करोड बराबरको ३० लाख कित्ता आईपिओ निष्काशन गरेको थियो । जस मध्ये १ लाख २० हजार कित्ता कर्मचारीको लागि र १ लाख ५० हजार कित्ता सामुहिक लगानी कोषको लागि छुट्याईएको थियो । बाँकि रहेको २७ लाख ३० हजारको कित्ताको लागि सर्वसाधारणले आवेदन दिएका हुन् ।
क्यापिटलले उपलब्ध गराएपछि आईपिओको नतिजा बिजपाटी डटकममा प्रकाशित हुने छ ।
हाल कम्पनीको चुक्ता पूँजी ७० करोड रुपैयाँ रहेको छ । सर्वसाधारण शेयर निष्काशन गरे पश्चात कम्पनीको चुक्ता पूँजी एक अर्ब रुपैयाँ पुग्ने छ ।
