सरकारको नीति तथा कार्यक्रम सर्वसम्मतले पारित भएको छ । प्रतिनिधिसभाको आइतबारको बैठकमा सभामुख कृष्ण बहादुर महराले नीति तथा कार्यक्रमलाई निर्णयार्थ प्रस्तुत गरेका थिए ।
यस अघि प्रधानमन्त्री केपी शर्मा ओलीले सांसदहरुले नीति तथा कार्यक्रममा उठाएका प्रश्नहरुको जवाफ दिएका थिए । जेठ ७ गते राष्ट्रपति विद्यादेवी भण्डारीबाट संघीय संसद्को संयुक्त बैठकमा पेश भएको नीति तथा कार्यक्रममा छलफलका क्रममा सांसदहरूले उठाएका प्रश्नमा प्रधानमन्त्रीले जवाफ दिएका हुन् ।
सरकारले पेस गरेको नीति तथा कार्यक्रममाथि ६ वटा संशोधन दर्ता भएका थिए । पारित हुनु अघि संशोधनका प्रस्तावहरूलाई निर्णयार्थ पेस गरि नीति तथा कार्यक्रम सर्वसम्मतले पारित भएको हो । नेपाली कांग्रेसका मिनेन्द्र रिजाल र राष्ट्रिय जनता पार्टीका अनिलकुमार झाले राखेको संशोधन प्रस्ताव भने बहुमतले अस्वीकृत भएको छ । अन्यले भने प्रस्ताव फिर्ता लिएका थिए ।
आजको बैठकमा अर्थमन्त्री खतिवडाले आर्थिक सर्वेक्षण पेश गरेका थिए । अब आगामी मंगलबार प्रतिनिधि सभा र राष्ट्रिय सभाको संयुक्त बैठकमा अर्थमन्त्री डा युवराज खतिवडाले ४ बजे बजेट पेश गर्ने छन् ।
