काठमाडौं महानगरपालिकाले ३५ दिनभित्र विज्ञापन कर बुझाउन सूचना जारी गरेको छ । महानगरपालिकाको विज्ञापन बोर्ड तथा प्रचार सामाग्री नियमन नीति २०७० अनुसार नगरभित्र प्रयोग हुने सबै खालको विज्ञापनको कर बुझाउन महानगरपालिकाले ३५ दिनको म्याद दिएको छ ।
काठमाडौं महानगरपालिकाभित्र स्वीकृत मापदण्डभित्र रहेका व्यावसायिक विज्ञापन सामाग्री, फ्लेक्स बोर्ड, होर्डिङ बोर्ड, नियोन साइन, डिजिटल बोर्ड, विज्ञापन तथा प्रचार सामाग्रीको कर बुझाउन महानगरले सूचना मार्फत आग्रह गरेको छ ।
तोकिएको समय सिमाभित्र विज्ञापन कर नबुझाए मापदण्ड बाहेकका विज्ञापन सामाग्री हटाइने र सो सामाग्री हटाउन लाग्ने शुल्क सम्बन्धित संस्था वा व्यक्तिबाट असुल उपर गरिने महानगरले जनाएको छ ।