सन् २०१९ मा हुने एएफसी एशियन कप छनोट चरणको आफ्नो पाचौं खेलमा नेपालले समूहको शीर्ष स्थानमा रहेको फिलिपिन्सलाई गोलरहित बराबरीमा रोकेको हो । घरेलु मैदान सातदोबाटो स्थित एन्फा कम्प्लेक्समा भएको खेलमा दुवै टोलीले गोल गर्ने राम्रो अवसर पाए पनि सदुपयोग गर्न नसक्दा खेल बराबरीमा टुंगिएको हो ।
यसअघि गएको चैतमा भएको अवे खेलमा नेपाल फिलिपिन्ससँग उसकै मैदानमा ४–१ ले पराजित भएको थियो । छनौट चरणमा एक खेल पनि जित्न नसकेको नेपाल छनौट चरणबाट गणितीय हिसाबबाट बाहिरिइसकेको छ । नेपालको एक अंक मात्र छ । फिलिपिन्स नौ अंकका साथ शीर्ष स्थानमा छ भने समान खेल खेलेको यमन ६ अंकसहित दोस्रो स्थानमा छ । त्यसैगरी ६ अंक नै जोडेको ताजिकिस्तान गोलअन्तरका आधारमा तेस्रो स्थानमा छ ।
यसै बीच नेपाली राष्ट्रिय फुटबल टिमका कप्तान तथा फरवार्डर अनिल गुरूङले यसै खेलबाट अन्तर्राष्ट्रिय फुटबलबाट सन्यास लिएका छन् । फिलिपिन्स विरुद्धको खेलबाट नेपालको जर्सीमा आफ्नो ५० औं क्याप पूरा गर्दै अनिलले सन्यास लिएका हुन् । १० वर्षे अन्तर्राष्ट्रिय फुटबल करिअरमा ५० अन्तर्राष्ट्रिय खेल पूरा गरेका उनले १० गोल गरेका छन् ।
अखिल नेपाल फुटबल संघ एन्फाले बिशेष कार्यक्रम गरी मंगलबार अनिलको बिदाई गरेको छ । एन्फा अध्यक्ष नरेन्द्र श्रेष्ठलगायतले अनिललाई विदाइ गरेका थिए ।
सन्यास लिँदै गुरूङले फुटबलबाट टाढा हुन नसक्ने भन्दै राष्ट्रिय टिममा नरहे पनि क्लबबाट भने खेल्ने बताए। उनले आफूले जानेको सिकेको कुरा बाँड्ने बताउदै सबै भन्दा धेरै आफ्नो १० नम्बर जर्सी र फ्यानहरु मिस गर्ने बताए ।
मैदानबाट बाहिरिनु अघि अनिलले मैदानको बीच भागमा ढोगेका थिए ।
