चीन सरकारले बनाइदिएर करिब ४ वर्ष अगाडी हस्तान्तरण गरेको कोटेश्वर–कलंकी खण्डको बल्खुमा सडक भत्काइएको विषयमा अख्तियार दुरुपयोग अनुसन्धान आयोगले छानबिन थालेको छ । चलिरहेको सडक भत्काएर अस्वभाविक मूल्यमा ठेक्का लगाइएको भन्दै चौतर्फी आलोचना भएपछि अख्तियारले छानबिन सुरु गरेको हो ।
सडक विभाग र काठमाडौँ सडक डिभिजनले आवश्यक नभई कमिशन खाने दाउमा चलिरहेको सडकको कालोपत्रे उक्काएको भन्दै अख्तियारले अनुसन्धान सुरु गरेको हो । अख्तियारले सडक विभाग, सडक डिभिजन र चक्रपथ आयोजनालाई अनुसन्धान गरिने भन्दै पत्र नै पठाएर छानबिन नसकिएसम्म सडक निर्माणमा रोक लगाएको छ ।
सडक डिभिजन कार्यलय काठमाडौँका प्रमुख नारायण प्रसाद निहुरेका अनुसार अहिले सडक निर्माणको काम रोकिएको छ । उनले अख्तियारले नमुना संकलन गरेर लगिसकेको जानकारी दिएका छन् ।
बल्खुदेखि कलंकीसम्म सर्भिस लेनको १.७ किलोमिटर खण्डको ‘बेसमेन्ट फेलियर’ भएको भन्दै १३ करोड ८२ लाख रुपैयाँमा ठेक्का लगाएर मर्मत थालिएको थियो । यो पैसा विश्व बैंकले दिएको सहायताबाट खर्च गर्न लागिएको हो ।
