नेपाल राष्ट्र बैंकले तिहार लक्षित सुनका सिक्का तथा असर्फीहरुको बिक्री वितरण गर्ने भएको छ । राष्ट्र बैंकको टक्सार विभागबाट कात्तिक १९ गते आइतबारदेखि शुरु भएको असर्फीको बिक्री वितरण कात्तिक २४ गते शुक्रबारसम्म जारी रहने बैंकले जनाएको छ ।
राष्ट्र बैंकका मुद्रा व्यवस्थापन विभागका अनुसार यसपटक पनि बैंकले २.५ ग्रामका, ५ ग्रामका र १० ग्रामका सुनको सिक्का सर्वसाधारणलाई उपलब्ध गराउने भएको छ । गाई अंकित २५ ग्राम, १० ग्रामका चाँदीका सिक्का, लक्ष्मी अंकित १० ग्राम, गणेश अंकित १० ग्राम र गजलक्ष्मी अंकित १० ग्राम चाँदीका सिक्का समेत बिक्री गर्ने जनाएको छ । उक्त असर्फी र सिक्का खरिद गर्दा नगद वा क्यूआरमार्फत भुक्तानी गर्न सकिने बैंकले जनाएको छ ।
खासगरी तिहारको धनतेरसका दिन यस्ता सुनका सिक्का, असर्फी तथा टक्सारहरु गृह प्रवेश गराउँदा ठूलो धन वृद्धि हुने जनविश्वास रहँदै आएको छ । सोहीकारण यस अवसरमा असर्फी चाहने सर्वसाधारणलाई राष्ट्र बैंकले सिक्का, असर्फी तथा टक्सारहरु उपलब्ध गराउने गर्छ ।