राष्ट्रिय बीमा कम्पनीको प्रमुख कार्यकारी अधिकृत(सीईओ) पदको लागि ९ जनाले आवेदन दिएका छन् । आवेदन दिनेहरुमा बीमा कम्पनीहरुको पूर्व सीईओ देखि हाल कम्पनीकै डेपुटी सीईओ पनि रहेका छन् ।
कम्पनीका अनुसार सीइओको लागि राजु नाथ खनाल, सुरेन्द्र थापा, सुवास कौराला कोईरला, उज्वल राज अर्याल, नविन सुवेदी, डा. शिव हरि श्रेष्ठ, नारायण कुमार भट्टराई, वृद्ध काजी श्रेष्ठ र रामदेव यादव रहेका छन् ।
जसमध्ये खनाल नेपाल बैंकबाट अवकाश प्राप्त भएका व्यक्ति हुन । उनी नेपाल बैंकको डिजीएम भईसकेका छन् । त्यसैगरी, सुरेन्द्र थापा तत्कालीन राष्ट्रिय बीमा संस्थान (हाल राष्ट्रिय जीवन बीमा कम्पनी) का पूर्व सहायक प्रशासक हुन् भने सुवाष कोईराला हाल राष्ट्रिय बीमा कम्पनीका डेपुटी सीईओमा कार्यरत छन् । उनी कम्पनीका हालका निमित्त सीईओ समेत हुन् ।
यसैगरी, उज्वलराज अर्याल नेपाल पुनर्बीमा कम्पनीका पूर्व कर्मचारी हुन् । उनी सीए समेत हुन् । नविन सुवेदी हाल यूनाईटड अजोड ईन्स्योरेन्सका डेपुटी सीईओ छन् । डा. शिव हरि श्रेष्ठ तत्कालीन बीमा संस्थानका पूर्व सीईओ हुन् भने नारायण कुमार भट्टराई तत्कालीन गुराँस लाईफ ईन्स्योरेन्सका पूर्व सीईओ हुन् । बुद्ध काजी श्रेष्ठ तत्कालीन लुम्बिनी जनरल ईन्स्योरेन्सको उच्च तहका कर्मचारी हुन् । हाल उनी सर्भेयर पेशामा आवद्ध छन् ।
कम्पनीको प्रमुख कार्यकारी अधिकृत पदपूर्ति समितिले माघ २४ गते सूचना जारी गर्दै सूचना प्रकाशन भएको मितिले २१ दिनभित्र आवेदन दिन भनेको थियो।