सालपा विकास बैंकले संस्थापक शेयर खरिदको लागि
सर्बसाधारणलाई आह्वान नगरिएको स्पष्ट पारेको छ । सम्झौता गरेको पक्षसँग मात्र
संस्थापक शेयर वापतको रकम जम्मा गर्न
आग्रह गरिएको तर आम सर्बसाधारणलाई शेयरको लागि आह्वान नगरिएको बैंकले प्रष्ट पारेको
हो ।
बैंकका प्रमुख कार्यकारी अधिकृत इश्वरमन
राईले बैंक यस अघि नै संस्थापक शेयरको सम्झौता गरेर पक्षलाई मात्र कबुल गरे वापतको
रकम जम्मा गर्न आग्रह गरिएको बताए । यदि सम्झौता गरेका पक्षले रकम हाल्न
नसक्ने भए मात्र सर्बसाधारणलाई संस्थापक शेयरको लागि आह्वान गरिने उनले बताए ।
बिजपाटीसँगको कुराकानीमा उनले भने 'बैंकले आम सर्वसाधारणलाई रकम हाल्नको आह्वान
गरेको छैन, यदि सम्झौता गरेका पक्षले रकम जुटाउन नसकेमात्र अन्यलाई आग्रह हुन्छ' ।
उनले संस्थापक शेयरको लागि सम्झौता गरेकाहरुलाई
बैंकले पत्राचार गरिसकेकोले सामाजिक संजालमा देखिएका पोस्टहरुको पछि नलाग्न समेत
आग्रह गरेका छन् । उनले भने 'हामीले अहिले आम पब्लिकलाई रकमको लागि आग्रह गरेका
छैनौ, सामाजिक संजालमा वा अन्य स्थानमा आएका सूचना हेरेर कसैलाई पनि रकम नदिन हामी
आग्रह गर्छौ' ।
प्रमुख कार्यकारी अधिकृत राईका अनुसार हाल बैंकको चुक्ता पुँजी १०
करोड छ । बैंकले २५ करोड संस्थापक शेयरको
लागि विभिन्न पक्षसँग सम्झौता गरिसकेको छ । सम्झौता अनुसारको रकम आएमा बैंकको
चुक्ता पुँजी ३५ करोड पुग्ने छ । यदि सम्झौता अनुसारको रकम नआएमा सम्झौता
गरेका भन्दा बाहेकका पक्षलाई आग्रह गरिने उनले बताए । बैंकको चुक्ता पुँजी ३५
करोड भएपछि १५ करोड बराबरको आईपिओ निष्काशन गर्ने छ । सर्बसाधारणलाई १५
करोडको आईपिओ बिक्रि गरेपछि बैंकको चुक्ता पुँजी ५० करोड पुग्ने छ । राष्ट्र
बैंकको नियम अनुसार एक जिल्ले कार्यकक्षेत्र भएका विकास बैंकले ५० करोड चुक्ता
पुँजी पुर्याउनु पर्नेहुन्छ ।
आईपिओ कहिले ?
प्रमुख कार्यकारी अधिकृत राईका अनुसार संस्थापकहरुबाट ३५ करोड बराबरको
रकम जम्मा भएपछि आईपिओ निष्काशन प्रक्रिया सुरु गरिने छ । प्रक्रिया
सुरु गरेको ५ देखि ६ महिनामा आईपिओ आउने उनले बताए ।राष्ट्र
बैंकले बैंकलाई छिटो तोकिएको चुक्ता पुँजी पुर्याउनलागि दबाब दिइरहेको छ ।
बैंकको कार्यक्षेत्र खोटांङ जिल्ला मात्र हो ।
बैंकले खोटाङमा ३ वटा शाखा मार्फत सेवा प्रदान गरिरहेको छ ।
नेपाल राष्ट्र बैंकले सालपलाई २०६९ सालमा लाइसेन्स दिएको हो । बैंकका अधिकांश
संस्थापक शेयरधनीहरु खोटांङवासी नै छन् ।