तातोपानी नाकाका प्रमुख भन्सार
अधिकृत दयानन्द केसीले शुक्रवारबाटै नाका बन्द गरिएको बताएका छन् । बिजपाटीसँग संक्षिप्त
कुराकानी गर्दै उनले कमर्शियल उद्देश्यका लागि चीनबाट आउने ट्रकहरू बिदाभरि उतै
रहने बताएका हुन् ।
दशैँमा नेपालमा दैनिक उपभोग्य
सामग्रीको अभाव नहोस् भनेर तिब्बतमा लकडाउन हुँदाहुँदै पनि चीनले तातोपानी नाकाबाट
सामान बोकेका कन्टेनरहरू पठाउन २० दिन अघि सहजीकरण गरिदिएको थियो ।
कोभिड संक्रमणदर बढेपछि गत साउन २३
गतेदेखि बन्द भएको तातोपानी नाका दशैंका लागि भनेर २० दिन अघि खोलिएको थियो । नेपालमा
दशैं शुरू भएपछि शुक्रवारबाट पुनः बन्द गरिएको हो ।
विदाको समयमा नाका बन्द गरिएता पनि
कुहिने प्रकारका फलफूल र तरकारीको आयात भने रोकिएको छैन ।
प्रमुख भन्सार अधिकृत केसीले बिजपाटीसँग
भने, 'शुक्रवारदेखि कार्यालय बन्द भयो । बिग्रने चीज जस्तै फलफूल र तरकारी छ भने
त्यो गाडी नेपाल आउँछ । अन्य कमर्शियल वस्तुहरू भने विदापछि मात्र उताबाट छुट्छन्
।'
उनले फलफूलहरू बोकेको ट्रक आयो भने
त्यही दिन छुटाउनुपर्ने बताए । 'अझै पनि दिनको २/३ वटा गाडी आइरहेकै छन्,' केसीले
भने ।
