Election 2079 Worldcup 2022

पूर्वाञ्चल विश्वविद्यालयले मौका परीक्षामा काखा/पाखा गरेपछि विद्यार्थी आक्रोशित, आन्दोलनको चेतावनी

बिजपाटी संवाददाता

बिजपाटी संवाददाता

Sep 07, 2022 | 10:25:47 AM मा प्रकाशित

laxmi bank

भरतपुरस्थित नेपाल पोलिटेक्निक इन्स्टिच्युटमा स्नातकमा कृषि र भेटेनरी पढ्ने सातौँ सेमेस्टरका विद्यार्थीहरू मौका परीक्षाको व्यवस्था नगरिएको भन्दै आक्रोशित बनेका छन् ।

विराटनगरमा रहेको पूर्वाञ्चल विश्वविद्यालयसँग सम्बन्धन लिएर संचालित इन्स्टिच्युटमा बीसीए र बीआइटी जस्ता अन्य संकायहरूको मौका परीक्षा भइरहेको तर कृषि र भेटेनरीमा मौका परीक्षा दिने व्यवस्था नगरिएको भन्दै विद्यार्थी आक्रोशित बनेका हुन् ।

पूर्वाञ्चल विश्वविद्यालयबाट सम्बन्धन प्राप्त गरेको विराटनगरस्थित इस्टर्न कलेज अफ इन्जिनियरिङमा अध्ययनरत छात्रा प्रजीना ढकालले सामाजिक सञ्जाल टिकटकमा एउटा भिडियो बनाएर नै विद्यार्थीहरूलाई मौका परीक्षा दिने व्यवस्था मिलाउन आग्रह गरेकी छिन् ।

यो विषय निकै पहिलादेखि उठिरहेको तर विश्वविद्यालय प्रशासन उदासीन देखिएको उनको भनाइ छ । भरतपुरस्थित नेपाल पोलिटेक्निक इन्स्टिच्युट मात्र नभएर पूर्वाञ्चलबाट सम्बन्धन प्राप्त अन्य कलेजहरूमा पनि यस्तो समस्या देखिएको इन्स्टिच्युटका अर्का एक विद्यार्थीले बिजपाटीलाई बताए ।

पूर्वाञ्चल विश्वविद्यालयको परीक्षासम्बन्धी विनियम २०७० को परिच्छेद ३ (५)को परीक्षा संचालनको बुँदा ४ मा सेमेस्टर परीक्षा प्रणालीमा अन्तिम वर्षको २ सेमेस्टरमा मौका परीक्षा संचालन हुने उल्लेख छ ।

तर पूर्वाञ्चल विश्वविद्यालय प्रशासनले अन्य संकायको मौका परीक्षा संचालन गरेको भए पनि कृषि र भेटेनरी संकायको मौका परीक्षा संचालन गरेको छैन ।


बीआइटी र बीसीए संकायको मौका परीक्षा आवेदनको सूचना


इन्स्टिच्युटका प्रबन्ध निर्देशक बाबुराम उपाध्यायले २०७६ सालको माघमै विश्वविद्यालयलाई परीक्षासम्बन्धी विनियममा उल्लेखित प्रावधान कार्यान्वयन गरिदिन चिठी लेखेका थिए । विश्वविद्यालयले त्यसको पनि सुनुवाइ गरेको छैन ।

उपाध्यायले त्यतिबेला लेखेका थिए, 'बीएस्सी अनर्स एजीतर्फ पुरानो पाठ्यक्रमअनुसार सातौँ सेमेस्टरमा ऐच्छिक विषयमात्र भएको तर हाल शैक्षिक सत्र २०७३/७४ देखि अनिवार्य विषयहरूसमेत थप भएकाले बढी विद्यार्थीहरू अनुत्तीर्ण हुने तर तिनीहरूले कुनै मौका परीक्षाको अवसर नपाई एक वर्षपछि मात्र आंशिक परीक्षार्थीको रूपमा परीक्षा दिन पाउने र त्यसको नतिजा प्रकाशन हुँदा थप एक वर्ष लाग्ने हुँदा निजहरूको अध्ययन र रोजगारीमा समेत ठूलो असर परेको छ ।'


नेपाल पोलिटेक्निक इन्स्टिच्युटले २०७६ सालमै विश्वविद्यालयलाई लेखेको पत्र


अहिले पनि उक्त समस्या ज्यूँका त्यूँ रहेको भन्दै विद्यार्थीहरू आक्रोशित र आन्दोलित भएका छन् । इन्स्टिच्युटले पटक-पटक विश्वविद्यालय समक्ष परीक्षासम्बन्धी विनियम कार्यान्वयन गर्न आग्रह गरेपनि अहिलेसम्म सुनुवाइ नभएको प्रमुख कार्यकारी अधिकृत शिव सुवेदीले बिजपाटीलाई बताए ।

'विद्यार्थीलाई समस्या परेको छ यसकारण परीक्षासम्बन्धी विनियममा लेखेको कुरा कार्यान्वयन गरिदिनुपर्यो भनेर हामीले पटक-पटक उपकूलपति, डीन र परीक्षा नियन्त्रकलाई पत्र पठाएका छौं,' सुवेदीले भने, 'त्यो कुरालाई इग्नोर गरिएको छ । अहिलेको कृषि र भेटेनरी इन्जिनियरिङ संकायमै हुँदा पनि मौका परीक्षा हुँदैनथ्यो । अहिले विद्यार्थीले नै कुरा उठाइरहेका छन्, हामी पनि यस विषयमा सिरियस छौं ।'

उनले विश्वविद्यालय प्रशासनसँग यस विषयमा कुराकानी भइरहेको बताए । 'हामीले औपचारिक रूपमा पत्र पठाएका छौं र अनौपचारिक रूपमा कुराकानी गरिरहेका छौं । उहाँहरू सकारात्मक हुनुहुन्छ,' उनले भने ।

विश्वविद्यालयका रजिस्ट्रार नीलमणि पोखरेलले विद्यार्थीहरूको गुनासो आफूसमक्ष आइपुगेको स्वीकारे । 'विनियममा भएअनुसारको व्यवस्था कार्यान्वयन गर्ने विषयमा हामीले छलफल गरिरहेका छौं,' पोखरेलले बिजपाटीसँग भने ।

पोखरेलले विनियममा यस्तो व्यवस्था पहिल्यैदेखि भएपनि विद्यार्थीहरूले कुरा नउठाएको बताए । 'विनियममा भएको व्यवस्था कुनै संकायमा लागू भएको र कुनैमा लागू नभएको रहेछ,' उनले भने, 'त्यतिबेला विद्यार्थी भाइबैनीहरूले कुरा उठाएनन् । यतिबेला एकैचोटी यस्तो आयो । हामी विद्यार्थीको पक्षमा के गर्न सक्छौं त्यसबारे छलफल गरिरहेका छौं ।'

पोखरेलले अहिले मात्र माग उठेको भनेर दाबी गरेपनि बिजपाटीलाई २०७६ सालमै भरतपुरस्थित इन्स्टिच्युटले लेखेको पत्र प्राप्त भएको छ । यसबाट विश्वविद्यालय प्रशासन नियमसंगत चल्न नखोजेको पुष्टि भएको छ ।

नेपाल पोलिटेक्निक इन्स्टिच्युटका अर्का एक विद्यार्थीले यदि मौका परीक्षा दिन नपाए आन्दोलन गर्ने चेतावनी दिए । नाम उल्लेख नगर्ने शर्तमा उनले भने, 'हाम्रो कमजोरीको फाइदा विश्वविद्यालयले उठाउन खोजेको हो भने हामी आन्दोलन गर्न बाध्य हुन्छौं । विश्वविद्यालय प्रशासनले यसलाई सिरियसली लिनुपर्छ ।'

Share Your Thoughts

Recent News

Main News

TRENDING

Close in 7


Bizpati.com © 2020. All Rights Reserved