.gif)
देशका विभिन्न ठाउँमा चुनावी गठबन्धन भएको छ । सत्ता गठबन्धनलाई कतिपय ठाउँमा अस्वीकार गरिएपनि बहुमत स्थानीय तहहरुमा माओवादी केन्द्र र एकिकृत समाजवादीबीच चुनावी तालमेल भएको छ ।
हालसम्म देशभरका स्थानीय तहमा उम्मेदवारी मनोनयन गराउनेहरुको संख्या १ लाख ३७ हजार नाघेको छ । देशभर सबै पदमा गरी १ लाख ३७ हजार ५८ जनाले मनोनयन दर्ता गराएका छन् ।
देशभरका २९३ नगरपालिकामा ३ हजार २७६ जनाले नगरप्रमुख (मेयर) पदमा उम्मेदवारी दिएका छन् । उपप्रमुख (उपमेयर) पदमा २ हजार ९ जनाले मनोनयन दर्ता गराएका छन् ।
४६० गाउँपालिकामा अध्यक्षका लागि ३ हजार २६४ जनाको मनोनयन परेको छ । २ हजार २९७ जनाले उपाध्यक्षमा उम्मेदवारी दिएका छन् ।
स्थानीय तहका ३५ हजार २२१ पदमा चुनाव हुँदैछ ।
तर, गठबन्धन मार्फत उम्मेदवारी दर्ता गराउने अधिकांश पुरुष छन् । गत निर्वाचनमा देशैभरका पालिकाहरुमा अपवादबाहेक उपप्रमुखमा महिला उम्मेदवार थिए । तर, यसपटक भने सत्ता गठबन्धन वा सत्ता भित्रकै माओवादी र समाजवादीबीच गठबन्धन भएका स्थानीय तहमा प्रमुख र उपप्रमुख तथा अध्यक्ष र उपाध्यक्ष दुबै पदमा पुरुष उम्मेदवार छन् ।
पोखरा महानगरमा भने काँग्रेसले उपमेयरमा कोपिला रानाभाटलाई उम्मेदवार बनाएको छ । मेयरमा समाजवादीका धनराज आचार्य छन् ।
अरु स्थानीय तहमध्ये मेयरमा ३ हजार २७६ को उम्मेदवारी पर्दा गठबन्धनका कारण उपमेयरको उम्मेदवारी २ हजारमा सिमित बनेको छ । त्यस्तै ३ हजार २६४ पालिका अध्यक्षका लागि उम्मेदवार पर्दा उपाध्यक्षमा जम्मा २३ सयको मात्रै उम्मेदवारी परेको छ ।
गठबन्धनका कारण अधिकांश ठाउँमा माओवादी र समाजवादी तथा केही ठाउँमा काँग्रेसका महिला नेतृहरु उम्मेदवारी दिनबाट बञ्चित बनाईएका छन् ।
तराई मधेशका जिल्लामा पनि गठबन्धनमा महिला उम्मेदवार नै छन् ।
एमाले भने एक्लै चुनावी मैदानमा भएकाले कतिपय ठाउँमा प्रमुखमा महिलालाई उम्मेदवार बनाएर उपप्रमुखमा पुरुष उम्मेदवार उभ्याएको छ । तालमेल भएका स्थानमा पनि आफूले मेयर वा अध्यक्ष लिएको ठाउँमा उपमेयर वा उपाध्यक्षको उम्मेदवार साझेदार दलबाट महिलालाई बनाएको छ ।
.gif)
