३५ प्रतिशत मतदान सम्पन्न, केही ठाउँमा विवाद

निर्वाचन आयोगले ३५ प्रतिशत मतदान सम्पन्न भएको जनाएको छ । अपराह्न १२ बजेसम्म देशैभरका २१ हजार ९५५ मतदान केन्द्रमा बिहान ७ बजेदेखि मतदान शुरू भएको हो ।

अपराह्न एक विज्ञप्ति जारी गर्दै आयोगले भनेको छ, 'स्थानीय तह सदस्य निर्वाचन २०७९ का लागि ७५३ वटै स्थानीय तहका १० हजार ७ सय ५६ मतदान स्थलका २१ हजार ९५५ मतदान केन्द्रमा बिहान ७ बजेदेखि छिटफुट घटना बाहेक शान्तिपूर्ण तथा उत्साहजनक रूपमा मतदान भइरहेको छ ।'

त्यस्तै अपराह्न अपराह्न १२ बजेसम्म देशभर करीब ३५ प्रतिशत मतदान भइसकेको प्रारम्भिक तथ्यांक प्राप्त भएको आयोगको भनाइ छ ।

आयोगले दोलखा, सर्लाही, सप्तरी, रामेछाप, पर्वत, हुम्ला र बाजुराका केही मतदानस्थलमा सामान्य विवादका कारण मतदान कार्य अवरुद्ध भएकोमा सुचारु गर्ने प्रयास भइरहेको पनि जानकारी दिएको छ ।

'उक्त स्थानहरूमा छिट्टै मतदान सुचारू हुने अपेक्षा लिइएको छ,' आयोगले जारी गरेको विज्ञप्तिमा उल्लेख छ ।