काठमाडौँ महानगर पालिकाको मेयरमा स्वतन्त्र
उम्मेदवार उठेका बालेन शाहमाथि खोटाङको दिक्तेलका दुई जनाले २८ केजी खसीको बाजी
राखेका छन् ।
सामाजिक सञ्जालमा भाइरल भएको एक सहमति पत्रमा
दिक्तेल रुपाकोट मझुवागही नगरपालिका वडा नम्बर ५ बस्ने बिजय फुयाल र सोही ठाउँमा
बस्ने रमेश खड्काबीच बाजी थापिएको उल्लेख छ ।
पत्रअनुसार बालेनले काठमाडौँको मेयर जितेमा रमेश
खड्काले २८ केजीको खसी बिजय फुयाललाई दिने र बालेनले मेयर हारेमा बिजयले २८ केजी
खसीको मूल्य दिने भएका हुन् ।
उनीहरूले साक्षी राखेर तमसुकको शैलीमा कागज नै
गराएका छन् । साक्षीका रूपमा सोही ठाउँ बस्ने राजन प्रसाद दुलाल र रोहवरमा सुमन
बास्तोला, सरोज खतिवडा र दिनेश आचार्य रहेका छन् ।
सामाजिक सञ्जालमा भाइरल भएको सम्झौता पत्र आधिकारिक हो, कि होइन भन्ने पुष्टि भने भएको छैन ।
यसैबीच जारी मतगणनामा बालेन शाहले करिब १२ सय मतको अग्रता बनाएका छन् । उनले २६ सय बढी मत पाउँदा एमालेका केशव स्थापितले १४ सय मत पाएका छन् । काँग्रेसकी सिर्जना सिंह तेस्रो नम्बरमा छिन् ।
बालेनलाई युवा र राजनीतिक क्षेत्रभन्दा बाहिरका व्यक्तिहरुले समर्थन गरिरहेका छन् । निर्वाचनको मुखैमा उनलाई कलाकारहरुले राम्रै समर्थन जनाएका थिए ।
उनी र्याप गायक तथा इन्जिनियर हुन् ।
