संसदीय समितिले डेडिकेटेड ट्रंकलाइनको बक्यौता १ महिना भित्र असुल गर्न सरकारलाई निर्देशन दिएको छ । संघीय संसदको प्रतिनिधिसभाको सार्वजनिक लेखा समितिको आइतबार बसेको बैठकले बक्यौता वापतको १० अर्ब १४ करोड ८ लाख ३० हजार रुपैयाँ बराबर रकम १ महिना भित्र सावाँ र ब्याज सहित असुल गर्न प्राधिकरण गर्नलाई निर्देशन दिएको हो ।
समितिले बक्यौता रकम उठाउन उर्जा मन्त्रालय र नेपाल विद्युत प्राधिकरणलाई निर्देशन दिएको हो । बैठकले बक्यौता रकम उठाएको जानकारी समेत समितिलाई दिन निर्देशन दिएको छ ।
डेडिकेटेड ट्रंकलाइनको बक्यौता सम्बन्धमा अध्ययन गर्न गठित उपसमितिको प्रतिवेदन बुझ्दै समितिले यस्तो निर्देशन दिएको हो । ०७६ साउन ५ गते लेखा समितिले कांग्रेस सांसद मीनेन्द्र रिजालको नेतृत्वमा उपसमिति गठन गरेको थियो।
डेडिकेटेड ट्रंकलाइनको विषयमा लामो समयदेखि उद्योगी र प्राधिकरणबीच विवाद छ ।