नेपाल विद्युत प्राधिकरण नाफामा गएपछि प्राधिकरणका कर्मचारीले बोनस माग गरेका छन् । बुधबार आयोजित प्राधिकरणको ३७ औ वार्षिकोत्सव समारोहमा प्राधिकरणमा क्रियाशील सबै कर्मचारी युनियनहरुले बोनस दिनको लागि प्राधिकरणको संचालक समिति समक्ष माग गरेका थिए ।
मुनाफा गर्ने प्रतिष्ठानले एक वर्षमा गरेको मुनाफाको १० प्रतिशत रकम कर्मचारीलाई बोनसको रुपमा बितरण गर्नु पर्ने ब्यबस्था रहेकोले आफुहरुले कानुन बमोजिम नै बोनस माग गरेका बताएका छन् ।
तर प्राधिकरणको संचालक समितिको अध्यक्ष समेत रहेकी ऊर्जा, जलस्रोत तथा सिँचाइमन्त्री पम्फा भुसालले भने कर्मचारीलाई बोनस नमाग्न आग्रह गरिन् । मन्त्री भुसालले यसै वर्ष मात्रै सरकारले कर्मचारीलाई १५ प्रतिशत तलब बढाएको स्मरण गर्दै थप आर्थिक सहयोगको माग नराख्न आग्रह गरिन् । उनले बोनस माग्न छाडेर सेवा सुधारमा लाग्न र सबै घर परिवारसम्म बिजुली पु¥याउने कार्यमा लाग्न कर्मचारीलाई निर्देशन समेत दिईन् । कोभिडको महामारीपछि अर्थतन्त्र तङ्ग्रिन नपाउँदै बोनसको कुरा उठ्नु सही नभएको उनले बताइन्।
बोनसको मागलाई मन्त्रीले ठाडै अस्विकार गरेपछि कर्मचारीहरु मन्त्रीसंग रुष्ट भएका छन् । आफुहरुले थप नयाँ सेवा सुविधा मागेको नभई , कानुनले नै ब्यबस्था गरेको बोनस आफुहरुले माग गरेको र नाफामा गएको प्रतिष्ठानको रुपमा प्राधिकरणले पनि कुनै बहाना बाजी नगरी नियम अनुसारको बोनस दिनु पर्ने उनीहरुको माग छ ।